2017-ի խորհրդարանական ընտրություններն իսկապես աննախադեպ կլինեն: Այս մասին այսօր՝ դեկտեմբերի 6-ին, ԱԺ-ում լրագրողների հետ զրույցում հայտարարեց Դաշնակցություն խմբակցության ղեկավար Արմեն Ռուստամյանը:
Անդրադառնալով հայազգի ամերիկացի հանրահայտ երաժիշտ Սերժ Թանկյանի հայտարարությանը առաջիկա խորհրդարանական ընտրություններում դիտորդական առաքելության հետ կապված՝ Ռուստամյանը նշեց. «Ես շատ ուրախ եմ, որ Սերժ Թանկյանը եւս ցանկանում է խորհրդարանական ընտրություններին հանդես գալ որպես դիտորդ: Համոզված են, որ նա կտեսնի իսկապես աննախադեպ ընտրությունների անցկացում, քանի որ այն, ինչ ընտրական համակարգում փոխել ենք, նախադեպ չունի: Մենք ամեն ինչ արել ենք արմատախիլ անելու այն բոլոր հարցերը, որոնք կապված էին իշխանությունների վերարտադրության հետ»: Այնուհետեւ նա շարունակեց, որ այսօր իսկապես այնպիսի ընտրական համակարգ ունենք, որի միջոցով ընտրությունները կարող են անցնել այնպես, որ իշխանություններն իրենց դիրքերը կարող են պահպանել վերընտրվելով, այլ ոչ թե վերարտադրությամբ, նույն կերպ ընդդիմությունը կարող է ընտրություններում հաջողություն գրանցել եւ իշխանափոխություն իրականացնել:
Դրանից զատ, ըստ Ռուստամյանի, ընդդիմության համար նվազագույն թվով մանդատներ է ամրագրված. այդպիսի բան երբեք չի եղել նախկինում Հայաստանում անցկացված ընտրություններում: «Ընդդիմությունն ինչպիսի արդյունքներ էլ գրանցի, Ազգային ժողովում նրա ներկայությունը 1/3 մասից պակաս չի լինի: Այսինքն՝ կունենանք քաղաքական նոր համակարգ, չի լինի մարդ, որը կունենա ներկայիս նախագահի լիազորությունները»,- նշեց Արմեն Ռուստամյանը՝ հավելելով, որ ընտրությունները հնարավորություն կտան իրականում ձեւավորել իշխանություն-ընդդիմություն հավասարակշռված համակարգ, ինչը Հայաստանում երբեք չի եղել:
