ՀԱԿ-ը իշխանությունների հետ չի կիսի իր գործողությունների պատասխանատվությունը: Այս մասին դեկտեմբերի 6-ին՝ ԱԺ-ում հայտարարեց ՀԱԿ խմբակցության ղեկավար Լեւոն Զուրաբյանը՝ ելույթ ունենալով 2017-ի պետբյուջեի վերջնամշակված նախագծի վերաբերյալ:
Ընդդիմադիրը նշեց, որ 2014-ի արդյունքներով՝ կառավարությունն ակնկալում է 2,4 տոկոսով տնտեսական աճ: Բայց Կենտրոնական բանկը, որը նախկինում կանխատեսել էր 3 տոկոսից ավելի աճ, այժմ ընդամենը 1,8 տոկոս է ակնկալում: Դա նշանակում է, որ իրենք՝ իշխանություններն էլ են ընդունում երկրի տնտեսությունը կարգավորելու հարցում իրենց անզորությունը: Կառավարությունը չի տեսնում, թե դա ինչպես անի, իսկ ՀԱԿ-ն այդպիսի տեսլական ունի, հավելեց նա: «Լավ օրինակ է հարեւան Վրաստանը, որտեղ հայերը գնում են բիզնես հիմնելու: Ըստ որում՝ չեմ ցանկանում դա կապել եվրաասոցացման հետ, որովհետեւ Մոլդովան եւ Ուկրաինան, հակառակը, կոռուպցիայի մեջ են թաղվել: Սակայն Վրաստանում ամեն ինչ այլ է: Պարզեցված է հարկային համակարգը, ուժեղացված է օրինականության վերահսկողությունը: Մենք էլ կարող ենք այդպես անել եւ մեզ մոտ գրավել նոր ներդրողների: Այդպես ընտրություններից առաջ մի քանի ամսում կհասնեք նրան, ինչը բաց եք թողել: Բայց ես շատ եմ կասկածում, որ դուք դա կանեք»,- ասաց Զուրաբյանը:
