ՆԱՏՕ-ի ու Եվրամիության համագործակցությունն ամրապնդելով՝ հնարավոր կլինի ավելի մեծ աջակցություն տրամադրել Ուկրաինային, հայտնել է ՆԱՏՕ-ի գլխավոր քարտուղար Ենս Սթոլթենբերգը։
«ԵՄ-ն ու ՆԱՏՕ-ն Ուկրաինային տրամադրում են աջակցություն ՝ քաղաքական ու գործնական, մենք օգնում ենք բարեփոխումների իրականացման ու պաշտպանական ոլորտի արդիականացման հարցերում։ Այսօր մենք հայտարարում ենք, որ ավելի սերտ կհամագործակցենք աջակցություն տրամադրելու, մասնավորապես ներուժ ստեղծելու, սովորեցնելու հարցերում։ Մենք կարող ենք ավելի արդյունավետ լինել»,- ասել է Ենս Սթոլթենբերգը Բրյուսելում ՆԱՏՕ-ի երկրների ԱԳ նախարարների նիստից հետո, փոխանցում է «Ինտերֆաքս ՈՒկրաինան»։
ԵՄ դիվանագիտության ղեկավար Ֆեդերիկա Մոգերինին էլ իր հերթին նշել է, որ ՈՒկրաինային Եվրամիության օգնության կենտրոնում տնտեսական ու սոցիալական բարեփոխումներն են, կոռուպցիայի դեմ պայքարը։
«Ատլանտիկայի երկու կողմերում էլ կա վստահություն, որ Ուկրաինան եվրոպական քաղաքականության առաջնահերթություն կմնա։ Մենք պնդում ենք, որ ամբողջովին կատարվեն Մինսկյան համաձայնագրերը․․․ Մենք հաճախ ենք հանդիպում ու քննարկում այս հարցերը, մանավանդ Ուկրաինայի արեւելքում հակամարտության կարգավորման վերաբերյալ»,- ասել է նա։