Դաշնակցությունից դուրս եկածները շարունակում են կրել ՀՅԴ գաղափարախոսությունը: Այս մասին այսօր՝ դեկտեմբերի 7-ին, Ազգային ժողովում լրագրողների հետ զրույցում ասել է ՀՅԴ խմբակցության ղեկավար Արմեն Ռուստամյանն՝ անդրադառնալով այն լուրերին, որ Ռուբիկ Հակոբյանը կվերադառնա իր հարազատ կուսակցություն՝ ՀՅԴ:
«Նրանք, ովքեր եղել են Դաշնակցության մեջ, պատահական չեն եղել, բոլորն էլ ընդունել են Դաշնակցության գաղափարախոսությունը եւ հիմա եթե դուրս են այդ կառույցից, այնուամենայնիվ այդ գաղափարախոսությունը կրողներն են»,-ասել է Արմեն Ռուստամյանն ու հավելել. «Դաշնակցության կառույցից շատերն են կարգապահական որոշակի ռեժիմի մեջ չտեղավորվելով դուրս եղել, դրանք են Գարեգին Նժդեհ, Անդրանիկ... էսպիսի դեմքեր են եղել, բայց դա չի նշանակում, որ նրանք չեն շարունակել իրականացնել նույն գաղափարախոսությունը»:
Ինչ վերաբերում է ՀՀԿ-ի հետ դաշինք կազմելուն եւ ֆինանսական խնդիրներին, Ռուստամյանն ասել է. «Հիմա դժվար է ասել, քանի որ շատ հստակեցումների խնդիրներ կան, ծրագրեր: Այս պահին մեր որոշումը հստակ է՝ մենք ընտրություններին գնալու ենք առանձնաբար»: Այնուամենայնիվ նա չբացառեց, որ այդ որոշումը կարող է փոխվել:
Հարցին՝ ՀՀԿ-ի հետ դաշինքը չի՞ սասանել իրենց մշտական 5-6 տոկոս ընտրազանգվածը, ՀՅԴ խմբակցության ղեկավարը պատասխանել է. «Դաշնակցության մշտական տոկոսը երբեք չի սասանվել, որովհետեւ հենց դա բնորոշ է գաղափարական կուսակցություններին: Այո նրանց տոկոսը կարող է շատ թռիչքային փոփոխություն չունենա, բայց կայուն է»:
Ռուստամյանը շեշտել է, որ Դաշնակցությունը տարաձայնություն չունի իր դրսի կառույցների հետ: Պատգամավորը շեշտել է, որ իրենք նվազագույն շեմը հաղթահարելու խնդիր չունեն: