Վայոց ձորի Ջերմուկ քաղաքում հիվանդի մահվան մեջ կասկածվող բժիշկ Արտակ Գեւորգյանն ու բուժքույր Նվարդ Հակոբյանը կատարվածի մեջ իրենց մեղավոր չեն համարում: Այս մասին NEWS.am-ի թղթակցին ասաց Ջերմուկի առողջության կենտրոնի տնօրեն Մանուշակ Նալբանդյանը:
«Այժմ քննություն է ընթանում, ամեն ինչ կպարզվի: Մեր բժիշկն ու բուժքույրն ասում են, որ իրենք սխալ ոչինչ չեն արել, չեն իմացել, որ այդ տղամարդն ալերգիկ է եղել: Նույնիսկ պարզ էլ չէ` արդյոք այդ տղամարդն իսկապես ալերգիկ է եղել, թե ոչ: Բացի դրանից, ասում են` իբր ներարկելուց հետո է հիվանդն այդ մասին հայտնել մեր բժշկին: Սա էլ է դեռ ուսումնասիրության փուլում»,- ասաց Մանուշակ Նալբանդյանը:
Արտակ Գեւորգյանը 30 տարվա բժիշկ է, շուրջ այդքան էլ աշխատել է Նվարդ Հակոբյանը: Ըստ կենտրոնի տնօրենի` նրանք երկուսն էլ շարունակում են աշխատել:
Քննչական կոմիտեն ավելի վաղ հաղորդել էր, որ Վայոց Ձորի Ջերմուկ քաղաքում նոյեմբերի 3-ին շտապօգնություն կանչած Գրիգոր Գրիգորյանին բժիշկները դեղ են ներարկել, որից հետո քաղաքացին գիտակցությունը կորցրել է եւ մահացել: Քաղաքացուն մի շարք ներարկումներ են կատարվել, հաշվի չի առնվել նրա ալերգիկ լինելու հանգամանքը, որի արդյունքում քաղաքացին գիտակցությունը կորցրել է եւ մահացել: Քրեական գործ է հարուցվել ՔՕ 130-րդ հոդվածի 2-րդ մասով՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը: Նշանակվել է դիակի դատաբժշկական փորձաքննություն, որի եզրակացությունը դեռ չի ստացվել: