Գառնի համայնքում անցած տարվա ամռանը հնչած կրակոցների գործով մեղադրյալ, «Գառնիի Սուրիկի լավաշ» արտադրական ձեռնարկության ղեկավարի որդուն առաջադրված մեղադրանքը շինծու է, ուռճացված: Այս մասին NEWS.am-ին ասաց գործարարի որդու` Ռուբեն Հակոբյանի պաշտպան Հովիկ Արսենյանը:
«Ռուբեն Հակոբյանի մեղադրանքն ակնհայտորեն չի համապատասխանում, ուռճացրած է եւ Ռուբեն Հակոբյանի գործողություններում չկան այն արարքները, որոնցում նրան մեղադրանք է առաջադրված: Չափազանց շինծու մեղադրանք է առաջադրվել»,- ասաց նա:
Հովիկ Արսենյանի կարծիքով` ճիշտ մեղադրանք չի առաջադրվել, իհարկե, իր պաշտպանյալի գործողություններում կա քրեորեն պատժելի արարք, սակայն այն արարքները չեն, որոնք առաջադրված մեղադրանքներն են ենթադրում:
Նշենք, որ այս գործը քննվում է Կոտայքի մարզի ընդհանուր իրավասության դատարանում: Այժմ վկաներն են հարցաքննվում:
Ըստ մեղադրական եզրակացության՝ «Գառնիի Սուրիկի լավաշ» արտադրական ձեռնարկության ղեկավար Անդրանիկ Հակոբյանի որդին՝ Ռուբեն Հակոբյանը, 2015 թ.-ի հուլիսի 10-ին ժամը 01:00-ի սահմաններում Գառնիում հանդիպել է գյուղապետի որդուն՝ Մարզպետ Վարդանյանին, որի բարեւին չի պատասխանել եւ ասել է, թե «ով ես արա, հեռացիր այստեղից»: Այնուհետեւ Մարզպետ Վարդանյանը Ռուբենին առաջարկել է գնալ գյուղի գազալցակայանի շրջակայքը եւ դրսեւորած կոպիտ եւ արհամարական վարքի համար պարզաբանում տալ: Հանդիպմանը ներկա էին նաեւ Մարզպետի ազգականներ Միքայել եւ Մեսրոպ Արտաշեսի Մկրտչյաններին: Այդ ընթացքում երիտասարդների միջեւ վիճաբանություն է տեղի ունեցել, որից հետո Ռուբենը հեռացել է՝ հրազեն ձեռք բերելու նպատակով: Կարճ ժամանակ անց Ռուբենը վերադարձել է նշված տարածք եւ ենթադրելով, որ Մարզպետը գտնվում է տեղում կայանված վերջինիս պատկանող «HUNDAI SONАТА» մակնիշի ավտոմեքենայում, սկսել է կրակահերթեր արձակել նշված ավտոմեքենայի ուղղությամբ: Իր կամքից անկախ հանգամանքներում հանցագործությունը Ռուբենն ավարտին չի հասցրել, քանի որ այդ ժամանակահատվածում Մարզպետն ավտոմեքենայի սրահում չի գտնվել եւ հեռացած է եղել գազալցակայանի տարածքից:
Ռուբենի հետ այդ պահին եղել է նաեւ Արա Հայրապետյանը:
Գործարարի որդուն մեղադրանք է առաջադրվել Քրեական օրենսգրքի 34-104-րդ հոդվածի 2-րդ մասի 10-րդ կետով եւ 235-րդ հոդվածի 1-ին մասով: Արա Հայրապետյանին մեղադրանք է առաջադրվել Քրեական օրենսգրքի 34-104-րդ հոդվածի 1-ին մասով եւ 235-րդ հոդվածի 1-ին մասով: Ռուբենը կալանավորված է, իսկ Արան գրավի դիմաց ազատ է արձակվել:
Ավելի վաղ հայտնել էինք, որ 2015թ. հուլիսի 9-ին Գառնիի գյուղապետ Աշոտ Վարդանյանը ոստիկանություն հաղորդում է ներկայացրել այն մասին, որ իրենց գյուղում հնչել են կրակոցներ, ինչի հետեւանքով վնասվել է որդու ավտոմեքենան:
Պարզվել է, որ հիշյալ օրը վիճաբանություն է տեղի ունեցել Վարդանյանի որդու՝ Մարզպետ Վարդանյանի, նրա երկու ազգականների եւ Ռուբեն Հակոբյանի միջեւ: Վիճաբանությունը վերածվել է ծեծկռտուքի, որի ընթացքում Ռուբեն Հակոբյանն ինքնաձիգով կրակահերթ է արձակել։ Վնասվել են գյուղապետի որդու ավտոմեքենան, գազալցակայանի սպասասրահի եւ օժանդակ շինության ապակիները: