28 տարի առաջ այս օրը՝ 1988-ի դեկտեմբերի 7-ին, ժամը 11:41-ին, Սպիտակի ավերիչ երկրաշարժը ցնցեց Հայաստանը: Ստորգետնյա ցնցումները կես րոպեում ավերեցին հանրապետության գրեթե ամբողջ հյուսիսային մասը: Ցնցումները զգացվել են նաեւ Երեւանում ու Թբիլիսիում: Պաշտոնական տեղեկություններով՝ զոհվել է ավելի քան 25 հազար մարդ, 19 հազարը հաշմանդամ է դարձել, անօթեւան է մնացել 530 հազար բնակիչ: Երկրաշարժի հետեւանքով հիմնովին ավերվել է Սպիտակ քաղաքը, տարերքն ընդգրկել է 21 քաղաք ու ավան, 324 գյուղ:
Երկրաշարժի տարելիցի կապակցությամբ այսօր Գյումրի է այցելել վարչապետ Կարեն Կարապետյանը։ Նա ծաղկեպսակ է դրել երկրաշարժի զոհերի հիշատակը հավերժացնող հուշահամալիրին, այցելել երկրաշարժի հետեւանքով տներից զրկված եւ նոր բնակարաններ ստացած քաղաքացիների: Շիրակի համայնքապետերի հետ էլ վարչապետը քննարկել է մարզի հիմնախնդիրները: Կարեն Կարապետյանն առաջնահերթ է համարել մարզում բիզնեսը զարգացնելու եւ աշխատատեղերի ստեղծման խնդիրները: Նա համայնքապետերին նաեւ կոչ է արել իրենց համայնքների զարգացման համար հստակ ծրագրեր մտածել եւ աշխատել դրանց իրագործման ուղղությամբ, իրենք էլ կօգնեն: Ներկաներից մեկը «թասիբի» հարց է համարել աղետից տուժած բոլոր քաղաքացիներին բնակարաններով ապահովելու խնդիրը: Նշենք, որ կառավարությունը խոստանում է տուժածների բնակարանային հարցն ամբողջությամբ լուծել 2017 թվականին՝ ողբերգությունից 29 տարի անց միայն:
Ազգային ժողովի նիստն այսօր մեկնարկել է մեկ րոպե լռությամբ. խորհրդարանում հարգել են 1988 թվականի Սպիտակի երկրաշարժի զոհերի հիշատակը: Կառավարության անդամներն այսօր վարչապետի գլխավորությամբ Ազգային ժողով էին եկել՝ պատասխանելու պատգամավորների հարցերին: Խորհրդարանականների հարցերը հիմնականում ուղղված են եղել Կարեն Կարապետյանին եւ վերաբերել են գազի գնին, ընտրություններից հետո գազի սակագնի թանկացման հավանականությանը: Կարապետյանը վստահեցրել է. նման բան տեղի չի ունենա:
Տիգրան Ուրիխանյանն էլ նախ հայտարարել է, որ «Հայռուսգազարդ»-ի պետական մասնաբաժինը 300 մլն դոլար պարտքի դիմաց «Գազպրոմ»-ին զիջելու գործարքի ժամանակ Կարեն Կարապետյանը «Գազպրոմ»-ի ղեկավար կազմում է եղել, եւ հետաքրքրվել, հիմա Հայաստանի կառավարությունը գլխավորող Կարապետյանը ճի՞շտ է համարում այդ գործարքը: Գազի սակագնի հնարավոր թանկացման եւ դրա դիմաց որեւէ ռազմավարական օբյեկտով վճարելու հավանականության մասին Կարեն Կարապետյանին հարց է ուղղել նաեւ Նիկոլ Փաշինյանը: Նրան նաեւ հետաքրքրել է. ճի՞շտ են մամուլի հրապարակումները, որ «Ամերիկանո» սուրճը «Ռուսիանո» վերանվանելու գաղափարի հեղինակը Հայաստանի վարչապետն է: Իրավիճակը զվարճացրել է Կարապետյանին:
Իսկ խորհրդարանի միջանցքներում իրադրությունն այսօր թեժ է եղել: Պատգամավոր Ռուբեն Հակոբյանը, պարզվում է, հայհոյել ու հարվածել է Hraparak.am-ի լրագրող Վահե Մակարյանին: Լրագրողը պատմել է, որ ինքը Հակոբյանին հարցրել է ՀՅԴ-ի գաղափարախոսության մասին, ինչին պատգամավորը պատասխանել է, որ պետք է այդ մասին կարդալ եւ հարցեր չտալ: Ռուբեն Հակոբյանը նաեւ հայտարարել է, թե այլեւս չի պատասխանելու լրագրողի հարցերին: Երբ առանձնացել են, լրագրողի պնդմամբ, պատգամավորը հարվածել է իրեն: Միջադեպի արդյունքում Վահե Մակարյանի աչքը կարմրել է, այտին քերծվածք է եղել: Ռուբեն Հակոբյանը լրագրողներին պարզաբանել է, որ Վահեն իրեն խուլիգանի նման է պահել, փորձել է էթիկայի դասեր տալ իրեն:
Ողբերգական վթար Արարատի մարզում: Նորաշեն գյուղի զորամասի մոտակայքում «UAZ» մակնիշի մեքենան դուրս է եկել ճանապարհի երթեւեկելի հատվածից եւ մոտ 300 մետր գլորվելով՝ հայտնվել ձորում: Պատահարի հետեւանքով մահացել է 56-ամյա Արամ Մանուկյանը, որը որդու եւ ընկերների հետ որսի էր գնում: Նրա որդին՝ 27-ամյա Արտակ Մանուկյանը եւ մյուս երկու ուղեւորները մարմնական վնասվածքներով հիվանդանոց են տեղափոխվել:
Մահվան ելքով պատահար Երեւանում: Հալաբյան եւ Արզումանյան փողոցների խաչմերուկում «Volksvagen Passat» մակնիշի ավտոմեքենան դուրս է եկել երթեւեկելի հատվածից, բախվել արգելապատնեշին եւ հայտնվել Թումանյանի այգում՝ աստիճանահարթակի վրա: Մեքենայի մոտակայքում հայտնաբերել են վարորդի՝ 29-ամյա Մայիս Կ.-ի դին, իսկ ուղեւորը՝ 27-ամյա Գրիգոր Կ.-ն, հիվանդանոց է տեղափոխվել: Ըստ տեղեկությունների՝ նրանք հորեղբորորդիներ են:
Երեւանում եռյակ է ծնվել: Դեկտեմբերի 6-ին կեսարյան հատման միջոցով լույս աշխարհ են եկել երեք տղաներ: Նորածինների եւ նրանց մոր՝ Երեւանի 29-ամյա բնակչուհի Նվարդ Թումանյանի վիճակը բավարար է:
Դեկտեմբերի 7-ին դոլարի վերելքը շարունակվել է: Արդյունքում դոլարի փոխարժեքը կազմել է 482 դրամ, եվրոյինը՝ 516, ռուբլունը՝ 7 դրամ 57 լումա, ֆունտինը՝ 606 դրամ։
Դեկտեմբերի 8-ին հանրապետության տարածքում սպասվում է առավելապես առանց տեղումների եղանակ: Օդի ջերմաստիճանը դեկտեմբերի 8-ի գիշերը կբարձրանա 3-5 աստիճանով, 8-ի ցերեկն ու 9-ի գիշերը՝ կնվազի: Երեւանում վաղը տեղումներ չեն սպասվում: