Սարի թաղում հուլիսի 19-ի դեպքերով հարուցված քրեական գործի շրջանակում կալանավորվածներին մեղադրանքն առաջադրվել է առանց տվյալ օրվա դեպքերի տեսանյութի ուսումնասիրման: Այս մասին NEWS.am-ի հետ զրույցում ասաց գործով կալանավորված Էդուարդ Զեյթունյանի կինը՝ տիկին Լալան:
«Մեղադրանք են առաաջդրում՝ առանց տեսանյութի զննման: Ոստիկանների տեսանութում իմ ամուսինը միայն մեկ անգամ է երեւում, եւ երեւում է, որ ինքը ոչինչ չի արել, ոչ մեկի նկատմամբ բռնություն չի գործադրել»,-ասաց նա:
Հիշեցնենք, որ ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը 2016թ․ հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են: Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները։
