ԱՄՆ նախագահ Բարաք Օբաման խոստովանել է, որ իրեն հանկարծակիի են բերել «Իսլամական պետություն» խմբավորման գործողությունները, որը 2014 թվականին Իրաքում, այնուհետեւ՝ Սիրիայում հսկայական տարածքներ է գրավել: Այս մասին գրում է ՌԻԱ Նովոստին:
«Խոշոր ցամաքային հարձակում կազմակերպելու՝ ԻՊ-ի հնարավորությունը չի եղել իմ հետախուզական ռադարի էկրանին»,- CNN-ին տված հարցազրույցում ասել է Օբաման:
Միաժամանակ, նա վստահ է, որ իր վարչակազմը միշտ լավագույն քայլերն է ձեռնարկել՝ ԻՊ-ի դեմ պայքարի համար:
Վերջին երկու տարիներին ԻՊ-ի էքսպանսիան գլխավոր միջազգային խնդիրներից է: Խմբավորումը, որը, ԿՀՎ-ի տվյալներով, սկսել է գործել 30 հազար զինյալից, գրավված տարածքներում խալիֆայություն է հայտարարել:
Ահաբեկիչների դեմ պայքարի համար 2014 թվականի ամռանն ԱՄՆ-ն միջազգային կոալիցիա ստեղծեց, որը հարվածներ է հասցնում ԻՊ-ի դիրքերի ուղղությամբ: Ընդ որում, այն Սիրիայում գործում է առանց Դամասկոսի համաձայնության:
