Ադրբեջանի պետանվտանգության ծառայության աշխատակիցները ձերբակալել են «Գյունդելիք Բաքը» թերթի խմբագիր Հաբիլ Վելիեւին: Այս մասին հաղորդում է Turan-ը:
Նրան ձերբակալել են «գործողության ընթացքում», սակայն ձերբակալության պատճառների եւ առաջադրված մեղադրանքների մասին ոչինչ չի հաղորդվում:
Անցյալ շաբաթ էլ ձերբակալվել էր «Բիզիմ դովրան» պարբերականի խմբագիր Սուրհայ Ալիեւը՝ դրամաշորթության մեղադրանքով: Հատկանշական է, որ երկու պարբերականներն էլ տարիներ առաջ ներառվել էին դրամաշորթությամբ զբաղվող պարբերականների սեւ ցուցակում, սակայն այս տարիների ընթացքում նրանց նկատմամբ որեւէ միջոց չի ձեռնարկվել, ինչը հիմք էր տալիս ենթադրելու, որ դրանց «տանիքը» բարձրաստիճան պաշտոնյաներ են:
Որոշ լրատվամիջոցների պնդմամբ՝ նշված թերթերը գործել են լուծարված ԱԱՆ-ի բարձրաստիճան պաշտոնատար անձանց հրահանգով, որոնք ներկայում ձերբակալված են:
