Արեւմտյան եւ տարածաշրջանային երկրները կախված են Սիրիայում Թուրքիայի ավերիչ նախագծի իրականացումից եւ ահաբեկիչների աջակցությունից։ Այս մասին «Ալ Վատան» թերթին տված հարցազրույցում ասել է Սիրիայի նախագահ Բաշար Ասադը։
Նրա խոսքով՝ Հալեպում այդ երկրների ձախողումը կշրջի իրադարձությունների ընթացքը եւ կդառնա Սիրիայում թշնամական պլանների պարտություն։
Անդրադառնալով արեւելյան Հալեպում Սիրիայի բանակի առաջընթացին եւ մարտակաբ գործողությունները դադարեցնելու մասին Ռուսաստանի հետ բանակցություններ վարելու ԱՄՆ եւ ՄԱԿ ձգտումներին՝ նախագահն ասել է, որ ամբողջ Սիրիան ազատագրելու որոշումն ընդունվել էր ամենասկզբում։ Սիրիան երբեք չի հրաժարվել այդ պլաններից եւ որեւէ շրջան ազատագրելու գաղափարից։
Անդրադառնալով միջազգային խուճապին եւ Հալեպի արեւելյան հատվածում գրոհայինների վախին, չնայած նրանց հիմնական մասը ահաբեկչական կազմակերպությունների միջազգային ցուցակի մեջ ներառված «Ջեբհաթ Ան-Նուսրայի անդամներ են, Ասադն ընդգծել է, որ ճգնաժամի առաջին տարիներին Դամասկոսում եւ Հոմսում, որը նրանք ցանկանում էին վերածել այդ կեղծ հեղափոխության օջախի, մարտական գործողություննեի ձախողումից հետո, Հալեպը նրանց վերջին հույսն է դարձել. «Ահաբեկիչների եւ նրանց աջակցողների համար Հալեպի առավելությունը նրա աշխարհագրական մերձավորությունն է Թուրքիային, քանի որ Հալեպում սահմանային օժանդակություն ապահովելը շատ ավելի հեշտ է: Հատկապես այդ պատճառով են ահաբեկիչները եւ նրանց աջակցողները վերջին 2 տարիների ընթացքում կենտրոնացել այդ քաղաքի վրա: Ահաբեկիչներից քաղաքի ազատագրումը կնշանակի նրանց պլանների արմատական տապալում, քանի որ ահաբեկիչների պարտությունը Դամասկոսում, Հոմսում եւ Հալեպում նշանակում է, որ նրանց մոտ իրական հաղթաթղթեր չեն մնացել, եւ իհարկե՝ նրանց մոտ, ովքեր նրանց աջակցում են»:
