Եվրասիական տնտեսական միությանը Հայաստանի անդամակցությունից հետո Եվրամիության հետ Երեւանի հարաբերություններին վիճակվեց օդում կախված մնալը: Այս մասին դեկտեմբերի 8-ին՝ «Եվրասիական եւ եվրոպական ուղղությունների միջեւ Հայաստանի արտաքին քաղաքականությունը» թեմայով կլոր սեղանի ընթացքում հայտարարեց Միջազգային հարաբերությունների եւ անվտանգության հարցերի ինստիտուտի ղեկավար Ստեփան Սաֆարյանը:
Նրա խոսքով՝ եթե երեք տարի առաջ ԵՏՄ-ին մասնակցության անհրաժեշտությունը պայմանավորված էր անվտանգության խնդիրներով, ապա այսօր պարզ է դարձել, որ Հայաստանի իշխանություններն իրենց հաշվարկներում սխալվել են: «Մենք փաստացի տեսնում ենք, որ բավական չէ, որ մեզ չհաջողվեց խուսափել ապրիլյան պատերազմից, դեռ ավելին՝ այսօր կանգնած ենք նոր պատերազմի սպառնալիքի առջեւ»,- նշեց Սաֆարյանը: Քաղաքագետը կարծում է, որ չնայած Հայաստանում ընդունված չէ այդ մասին բարձրաձայն խոսել, բայց ԵՏՄ-ը Հայաստանի սահմանափակման եւ վերահսկման նախագիծ է:
Ինչ վերաբերում է Հայաստանի եւ ԵՄ-ի հարաբերություններին, ապա, Սաֆարյանի խոսքով, այդ ուղղությամբ արդեն մի քանի տարի է՝ ոչ մի տեղաշարժ չկա: «Եթե երկար ժամանակահատվածում հարաբերություններն անորոշ են մնում, դա բացասական հետեւանքներով է հղի, այդ թվում՝ անվտանգության տեսակետից»,- ասաց փորձագետը: