Արցախի դիրքերից մեկում համածառայակցի կողմից նետված նռնակից վիրավորում ստացած Գառնիկ Տերտերյանի վիճակը բավարար է:

NEWS.am-ի տեղեկություններով, զինծառայողն առաջին բուժօգնություն է ստացել Մարտակերտի հոսպիտալում, այնուհետեւ տեղափոխվել Ստեփանակերտ: Նրա վիճակը բավարար է գնահատվում, ստացել է բեկորային վիրավորում:

Ըստ Քննչական կոմիտեի տարածած հաղորդագրության` N զորամասի պահպանության տեղամասի մարտական դիրքի, առույգ հերթափոխի դիտորդ, նռնակաձիգի օգնական, ժամկետային զինծառայող, շարքային Ալբերտ Պոստոլոկյանը դեկտեմբերի 8-ին ժամը 02:10-ի սահմաններում ծառայողական նպատակով իրեն տրամադրված նռնակը նետել է գետնատնակի մուտքի ուղղությամբ: Նռնակի պայթյունից բեկորային վիրավորում է ստացել հերթափոխի՝ հանգստացող ավագ հրաձիգ, ժամկետային զինծառայող, շարքային Գառնիկ Տերտերյանը, որից հետո Ալբերտն իրեն ամրակցված ինքնաձիգից կրակոցներ է արձակել իր ծնոտի շրջանում եւ ստացած հրազենային վիրավորումից տեղում մահացել է:

Ձեռնարկվում են անհրաժեշտ քննչական գործողություններ՝ քրեական գործով բազմակողմանի, օբյեկտիվ եւ լրիվ հետազոտումն ապահովելու ուղղությամբ։