Ոստիկանության ՊՊԾ գնդի գրավման հետ կապված միջադեպը մեծ ազդեցություն ունեցավ ոստիկանական համակարգի վրա բացասական առումով, քանի որ բախումներ եղան։ Այս մասին դեկտեմբերի 8-ին՝ ԱԺ–ում «Ոստիկանությունում ծառայության մասին» օրինագծի քննարկման ժամանակ, ասել է ՕԵԿ պատգամավոր Հեղինե Բիշարյանը։
«Ո՞րն էր պատճառը, որ նրանք կարողացան մտնել ՊՊԾ գնդի տարածք։ Դա նույնպես ոստիկանական ծառայության հետ կապված խնդիր է։ Եվ ինչու՞ տեղի ունեցան բախումները, որոնք հասարակության մեջ ոստիկանական համակարգի նկատմամբ բացասական գնահատականի հանգեցրին»,– հարցադրում է արել Բիշարյանը։
Պատասխանելով նրա հարցին՝ փոխոստիկանապետ Վարդան Եղիազարյանն ասաց. «Քանի որ նախաքննություն է ընթանում, կարծում եմ, որ այնքան էլ նպատակահարմար չէ այդ հարցին անդրադառնալ հենց հիմա»։