Եվրասիական տնտեսական միությանն անդամակցելուց հետո Հայաստանը տնտեսական աննախադեպ հաջողություն է գրանցել: Դեկտեմբերի 8-ին՝ «Եվրասիական եւ եվրոպական ուղղությունների միջեւ Հայաստանի արտաքին քաղաքականությունը» թեմայով կլոր սեղանի ընթացքում նման տեսակետ հայտնեց «Ինտեգրում եւ զարգացում» հասարակական կազմակերպության ղեկավար Արամ Սաֆարյանը:
Նրա խոսքով՝ չնայած շատ քաղաքական ուժեր եւ փորձագետներ թերագնահատում են Հայաստանի տնտեսության մեջ ԵՏՄ-ի դերը, թվերը միանգամայն այլ բանի մասին են վկայում: «2016-ի հուլիսին Հայաստանի եւ Ռուսաստանի միջեւ ապրանքաշրջանառությունը պատմական ռեկորդ է սահմանել: 20 տոկոսով ավելացել է Ռուսաստան արտահանումը, իսկ տնտեսական աճը կազմել է 7,4 – 7,6 տոկոս»,- նշեց Սաֆարյանը:
Ըստ որում՝ փորձագետը կարծում է, որ Հայաստանի համար անհրաժեշտ է միաժամանակ զարգացնել տնտեսական համագործակցության այլ ուղղությունները եւս, այդ թվում՝ ԵՄ-ի երկրների եւ ԱՄՆ-ի հետ:
