Արցախի դիրքերից մեկում համածառայակցի կողմից նետված նռնակից վիրավորում ստացած Գառնիկ Տերտերյանը մի քանի ամսվա զինծառայող է: Այս մասին NEWS.am-ի հետ զրույցում ասաց վիրավոր զինծառայողի ընտանիքի մտերիմներից մեկը:  Նա նշեց, որ Գառնիկը բանակ էր զորակոչվել հունիս ամսին, նա այս ամիսների ընթացքում ծառայությունից դժգոհություներ երբեք չի ունցել:

«Դիրքեր գնալուց առաջ միշտ ծնողներին զանգում է, միշտ էլ հետաքրքրվում են՝ խնդիրներ ունի ինչ-որ մեկի հետ, բայց երբեք դժգոհություններ չի հայտնել ծառայությունից կամ էլ ծառայակիցներից»,-ասաց նա:

Տերտերյանների ընտանիքի մտերիմի խոսքով՝ Գառնիկը համեստ եւ ընկերասեր տղա է եւ չէր կարող ծառայակցի հետ կռիվ հրահրել. թե ինչ է իրականում տեղի ունեցել զինծառայողների միջեւ՝ դեռ պարզ չէ:

«Գառնիկի հորեղբայրը Մեղրիում թուրքի կողմից արձակված գնադկից է մահացել: Նրա անունն էլ հորեղբոր անունով են դրել: Շատ լավ, համեստ ու գրագետ ընտանիքից է, ինք չէր կարող ծառայակցի հետ կռիվ հրահրել: Նա մասնագիտությամբ խոհարար է, իրենից փոքր եղբայր եւ մեծ քույր ունի, բոլորն էլ դաստիարակված, լավ երեխաներ են»:

Նշենք, որ վիրավոր զինծառայողը Երեւանի բնակիչ է:

NEWS.am-ի տեղեկություններով, Գառնիկ Տերտերյանը առաջին բուժօգնությունը ստացել է Մարտակերտի հոսպիտալում, այնուհետեւ տեղափոխվել՝ Ստեփանակերտ: Նրա վիճակը բավարար է, ստացել է բեկորային վիրավորում:

Ըստ Քննչական կոմիտեի տարածած հաղորդագրության` N զորամասի պահպանության տեղամասի մարտական դիրքի, առույգ հերթափոխի դիտորդ, նռնակաձիգի օգնական, ժամկետային զինծառայող, շարքային Ալբերտ Պոստոլոկյանը դեկտեմբերի 8-ին ժամը 02:10-ի սահմանում ծառայողական նպատակով իրեն տրամադրված նռնակը նետել է գետնատնակի մուտքի ուղղությամբ: Նռնակի պայթյունից բեկորային վիրավորում է ստացել հերթափոխի՝ հանգստացող ավագ հրաձիգ, ժամկետային զինծառայող, շարքային Գառնիկ Տերտերյանը: Ալբերտ Պոստոլոկյանը  իրեն ամրակցված ինքնաձիգից կրակոցներ է արձակել իր ծնոտի շրջանում եւ ստացած հրազենային վիրավորումից տեղում մահացել է:

Ձեռնարկվում են անհրաժեշտ քննչական գործողություններ՝ քրեական գործով բազմակողմանի, օբյեկտիվ եւ լրիվ հետազոտումն ապահովելու ուղղությամբ։