Հայտնի է կաշառքի մեջ մեղադրվող դատավոր Իշխան Բարսեղյանի գործով դատական առաջին նիստի օրը:
NEWS.am-ը Դատական տեղեկատվական համակարգից տեղեկացավ, որ դատական առաջին նիստը կկայանա դեկտեմբերի 15-ին Շենգավիթ վարչական շրջանի ընդհանուր իրավասության դատարանում: Դատավորն է Կարեն Մարդանյանը:
Ըստ մեղադրական եզրակացության` Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել եւ անձամբ ստացել է խոշոր չափերով կաշառք: Փաստաբան Էլզա Զաքարյանն էլ կաշառք տվողի եւ կաշառք ստացողի միջեւ կաշառքի շուրջ համաձայնության գալուն եւ կայացած համաձայնության իրականացմանը նպաստելով` կատարել է կաշառքի միջնորդություն:
Իշխան Բարսեղյանին մեղադրանք է առաջադրվել Քրեական օրենսգրքի 311-րդ հոդվածի 4-րդ մասի 3-րդ կետով, այն է` կաշառք ստանալը, որը կատարվել է դատավորի կողմից եւ պատժվում է ազատազրկմամբ՝ 7-12 տարի ժամկետով՝ գույքի բռնագրավմամբ կամ առանց դրա: Էլզա Զաքարյանին մեղադրանք է առաջադրվել Քրեական օրենսգրքի 313-րդ հոդվածի 1-ին մասով, այն է` կաշառքի միջնորդությունը՝ կաշառք տվողի եւ կաշառք ստացողի միջեւ կաշառքի շուրջ համաձայնության գալուն կամ արդեն կայացած համաձայնության իրականացմանը նպաստելը, որը պատժվում է տուգանքով` նվազագույն աշխատավարձի հարյուրապատիկից երկուհարյուրապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:
Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:
