Samsung-ը նոր անօդաչու է արտոնագրել: Առայժմ հայտնի չէ, թե նոր մոդելն ինչպես կկոչվի, սակայն հարավկորեացիները իրենց հայրենիքում հայց են ներկայցրել թռչող ափսեի տեսք ունեցող դրոնի արդյունաբերական նմուշի արտոնագիր ստանալու համար: Այս մասին հայտնում է Planet-today-ը:
Արտոնագրման համար ներկայացված լուսանկարներում անօդաչուն սկավառակաձեւ կառուցվածք ունի՝ ներքեւի հատվածում 2 ոտքով եւ վերին հարթության վրա բաց վանդակաճաղով, որը ենթադրաբար գտնվում է ներսում տեղակայված ռոտորի վրա: Ի տարբերություն մյուս անօդաչու թռչող սարքերի՝ այս դրոնը նման է փոքր չճանաչված թռչող օբյեկտի կամ թռչող սկուտեղի:
Samsung-ից հայտնել են, որ դիզայնի հարցում իրենց ոգենշնչել են «սկավառակաձեւ տիեզերական սարքերը»: Չնայած արտոնագրում նշվում է, որ կառուցվածքի որոշ տարրեր կփոխվեն, բայց ընդհանուր դիզայնը հավանաբար նախկինը կմնա: Այլ մանրամասներ՝ չափերի, հզորության կամ խցիկի տեսակի մասին չի հաղորդվում: