Ադրբեջանի արտգործնախարար Էլմար Մամեդյարովի հայտարարությունը, որում նա փորձում է Վիեննայի համաձայնությունների չկատարման պատասխանատվությունը բարդել հայկական կողմի վրա, ոչ այլ ինչ է, քան դատարկ բառեր։ Այս մասին NEWS.am –ի թղթակցի հետ զրույցում ասել է ռուս քաղաքագետ Ալեքսանդր Սկակովը։
Նրա խոսքով, Բաքուն արդեն 25 տարի է նույնատեսակ քաղաքականություն է վարում։ «90-ականներից սկսած՝ Ադրբեջանը հրաժարվում է ղարաբաղյան հակամարտության կարգավորման բոլոր պարտավորություններից, ամբողջ պատասխանատվությունը գցելով Երեւանի վրա»,- նշեց քաղաքագետը։
Հիշեցնենք, որ Ադրբեջանի արտգործնախարար Էլմար Մամեդյարովը, ելույթ ունենալով Համբուրգում, ԵԱՀԿ արտգործնախարարների խորհրդի նիստի ժամանակ, հայտնել է, որ Լեռնային Ղարաբաղի շուրջ առարկայական բանակցությունների շրջանակում նախապայմաններ առաջ քաշելու՝ Հայաստանի փորձերը խոչընդոտում են Վիեննայում ու Պետերբուրգում նախագահների կողմից ձեռք բերված պայմանավորվածությունների իրականացումը, նաեւ ամբողջ խաղաղ գործընթացը։