Եվրոպայում սպառազինումների վերահսկողության համակարգը չի համապատասխանում այսօրվա իրողություններին, այն պետք է վերակազմակերպվի։ Այս մասին ասել է Գերմանիայի արտգործնախարար Ֆրանկ Վալտեր Շթայնմայերը, փակելով Համբուրգում ԵԱՀԿ ԱԳՆԽ լիագումար նիստը, փոխանցում է «ՌԻԱ Նովոստին»։

«Սպառազինումների հսկողության ճարտարապետությունը, որը երկար ժամանակ եղել է Եվրոպայում խաղաղության , անվտանգության ու կայունության հուսալի խարիսխը, դարձել է փխրուն, այն այլեւս չի համապատասխանում այսօրվա քաղաքական, ռազմական, տեխնոլոգիական իրողություններին։ Մենք պետք է այստեղ ընդունենք միջոցառումներ, որպեսզի ավելի մեծ համաչափություն ու վստահություն ապահովենք»,- ասել է Շթայնմայերը, հավելելով, որ տվյալ փոփոխությունները պետք է հանգեցնեն ՛ավելի մեծ անվտանգության բոլորի համար»։

Ավելի վաղ Գերմանիայի արտգործնախարար Ֆրանկ Վալտեր Շթայնմայերը Frankfurter Allgemeine Zeitung թերթում իր հոդվածում կոչ էր արել Եվրոպայում սպառազինումների վերահսկողության մասին նոր համաձայնագիր կնքել, խուսափելու համար Ռուսաստանի ու ՆԱՏՕ-ի միջեւ սպառազինումների նոր մրցավազքից։ Շթայնմայերը նաեւ հայտնել էր, որ Ռուսաստանը արդեն բազմիցս կոչ է արել այս առթիվ բանավեճ սկսել։