Եվրամիությունն ու Հայաստանը որակը արագությունից վեր են դասել ու բավականին մոտ են համաձայնագրի կնքման շուրջ բանակցությունների ավարտին։ Այս մասին NEWS.am–ի թղթակցի հարցին ի պատասխան ասել է ԵՄ արտաքին գործերի ու անվտանգության քաղաքականության հարցերով մամուլի քարտուղար, ԵՄ արտաքին քաղաքականության ծառայության ղեկավարի պաշտոնական ներկայացուցիչ Մայա Կոսյանչիչը։

Նրա խոսքով բանակցությունները լավ են ընթանում։ «Նոյեմբերի վերջին մենք անցկացրեցինք համաձայնագրի քաղաքական մասերի վերաբերյալ բանակցությունների 6-րդ փուլն ու ավարտեցինք առեւտրի վերաբերյալ 4-րդ փուլը։ Տարբեր այլ ոլորտներում համագործակցության վերաբերյալ զուգահեռ բանակցություններում նույնպես առաջընթաց կա տեսակոնֆերանսների միջոցով»,- ասել է Մայա Կոսիյանչիչը։ Այդ տեսակոնֆերանսներից վերջինը, շարունակեց նա, անցել է հոկտեմբերի 30-ին ու վերաբերում էր էներգետիկ համագործակցությանը։ «Մենք որակը արագությունից վեր ենք դասել ու չնշելով բանակցությունների ավարտի համար որոշակի օր՝ ես կասեի, որ մենք բավականին մոտ ենք այդ նպատակին։ Բանակցություններում գիտես, թե երբ ես սկսում, բայց չես կարող 100 տոկոսով կանխատեսել դրանք ավարտելու ու համաձայնագիրը կնքելու օրերը։ Դա մեծամասամբ կախված է բանակցություններն ավարտելու հարցում Հայաստանի կառավարության կամքից»,- շեշտեց Մայա Կոսիյանչիչը։ Հայաստան-ԵՄ համաձայնագիրը, հավելեց նա, կարող է վավերացվել բանակցություններն ավարտելուց անմիջապես հետո։

Հիշեցնենք, որ ԵՄ պատվիրակության ղեկավար, դեսպան Պյոտր Սվիտալսկին հայտնել էր, որ բանակցությունների հաջորդ՝ 7-րդ փուլն անցնելու է այսօր՝ դեկտեմբերի 9-ին, Բրյուսելում։