Ազգային ժողովի աշնանային նստաշրջանի վերջին ճեպազրույցներում արդեն նախընտրական տրամադրություններ էին: Խոսվել է ընտրացուցակների, դրանք գլխավորողների, ընտրություններին միայնակ կամ քաղաքական միավորումներով մասնակցելու մասին: Հստակություններ արդեն կան: ՀՀԿ-ի նախընտրական ցուցակը գլխավորելու է հանրապետության նախագահ, կուսակցության ղեկավար Սերժ Սարգսյանը: Վահրամ Բաղդասարյանը դրան որեւէ խոչընդոտ չի տեսնում:
Հայ ազգային կոնգրեսի նախընտրական ցուցակն էլ գլխավորելու է ՀՀ առաջին նախագահ Լեւոն Տեր-Պետրոսյանը: Լեւոն Զուրաբյանը չի բացառում, որ մինչ ընտրությունները քաղաքական այլ ուժերի հետ հանդիպումներ կլինեն, բայց, ըստ նրա, հազիվ թե Տեր-Պետրոսյանին այլընտրանք առաջարկվի:
Միքայել Մելքումյանն առայժմ դժվարանում է ԲՀԿ-ի ցուցակի առաջին դեմքի անունը նշել: Ասում է՝ ակտիվ քաղաքականություն Գագիկ Ծառուկյանի վերադարձի, կրկին ԲՀԿ-ն գլխավորելու եւ ընտրություններին մասնակցելու ձեւաչափի մասին Ծառուկյանն ինքը կհայտարարի, ընդ որում՝ մոտ ապագայում: Անդրադառնալով խոսակցություններին, որ Ծառուկյանը հանդիպել է Սերժ Սարգսյանի հետ եւ ընտրություններին մասնակցելու «դաբրո» ստացել, Մելքումյանը կարծիք է հայտնել, որ «դաբրո»-ի ինստիտուտը պարզապես հնացել է:
«Հայկական վերածնունդ»-ն ընտրություններին միայնակ է մասնակցելու: Այլ ուժերի հետ քննարկումներ կլինեն, բայց դաշինք կազմելու հավանականությունը Մհեր Շահգելդյանը բացառում է:
Գերմանիայի արտգործնախարարը չի ուզում «մատով ցույց տալ», բայց ղարաբաղյան հակամարտության բանակցությունները փակուղի մտցնելու մեղավոր է համարում ապրիլյան պատերազմը սկսողներին: Ֆրանկ-Վալտեր Շթայնմայերն այսպես է պատասխանել բանակցային գործընթացի մասին ադրբեջանցի լրագրողի հարցին: Փոխարենը խնդրի մասին թափանցիկ ակնարկներով չեն խոսում ԵԱՀԿ Մինսկի խմբի համանախագահները: Դիտարկմանը, որ եռանախագահող երկրների արտգործնախարարների հայտարարությունում հստակ անուն չի տրվել, թե ում է ուղղված բռնությունը դադարեցնելու կոչը, Էդվարդ Նալբանդյանն արձագանքել է. նրանք դիվանագիտական լեզվով են խոսում: Տարածած հայտարարության մեջ եռանախագահները մտահոգություն են հայտնել ապրիլյան բռնություններից հետո շարունակվող զինված միջադեպերի առիթով, դատապարտել ուժի կիրառումը կամ ուժի կիրառման սպառնալիքը:
Նշենք, որ երեկ երեկոյան Համբուրգում կայացել է Հայաստանի եւ Ադրբեջանի ԱԳ նախարարներ Էդվարդ Նալբանդյանի եւ Էլմար Մամեդյարովի ու ԵԱՀԿ Մինսկի խմբի համանախագահների հանդիպումը: Չի բացառվում նաեւ Ադրբեջանի եւ Հայաստանի նախագահների մակարդակով հանդիպում: Էդվարդ Նալբանդյանի խոսքով, սակայն, այդ հանդիպումները պետք է ավելի մանրակրկիտ պատրաստվեն, որովհետեւ մեր հարեւան երկրից հայտարարություններ են հնչում, որ միջազգային իրավունքը ոչինչ է եւ կարեւորն ուժի կիրառումն է:
Ինչպես անել, որ գիտնականները լավ ապրեն: Գիտությունների ազգային ակադեմիայում վարչապետ Կարեն Կարապետյանն այս հարցը քննարկել է հենց գիտնականների հետ: Վարչապետն առաջարկել է հստակ ձեւակերպել բոլոր առաջարկներն ու կարիքները, դրանց տրամաբանությունը, իսկ բոլոր տրամաբանական առաջարկներն աջակցություն կստանան: Կարեն Կարապետյանն ընդգծել է. գիտության ոլորտի համար պատրաստ է ապահովել բոլոր անհրաժեշտ հարթակները: Հենց հանդիպման ընթացքում առաջին գործնական առաջարկն է հնչել. «Հայկենսատեխնոլոգիա»-ի ղեկավար Աշոտ Սաղյանի խոսքով՝ կենտրոնն էկոլոգիապես մաքուր կենսապարարտանյութ է արտադրում, որը կարող է լավագույնս փոխարինել ազոտական պարարտանյութին, բայց պետությունը պարարտանյութը մասնավորի միջոցով ներկրում է արտերկրից: Վարչապետը խոստացել է հանդիպում կազմակերպել ոլորտի պատասխանատու նախարարի հետ:
Հալեպում գնդակոծության է ենթարկվել հայ համայնքին պատկանող ծերանոցը: Բերիո թեմի տեղեկացմամբ՝ ահաբեկիչները հրթիռակոծել են հայաբնակ Նոր Գյուղ թաղամասում գտնվող Գյուլբենկյանի անվան ծերանոցը: Շենքը վնասվել է: Բարեբախտաբար, ծերանոցում բնակվող տարեցները չեն տուժել: Արդեն սկսել վերականգնել շենքը:
Ողբերգական դեպք Արարատի մարզում: Դալար գյուղով անցնող երկաթգծի ուղեփակոցի մոտ վաղ առավոտյան երիտասարդ տղամարդու դի է հայտնաբերվել՝ գլուխը պոկված: Պարզվել է, որ նա Դալարի 26-ամյա բնակիչն է, անունը՝ Արայիկ։ Գյուղում տարածված տեղեկությունների համաձայն՝ երիտասարդը գիշերն ինքնասպանություն է գործել՝ գլուխը դնելով երկաթգծի ռելսին: Ոստիկանությունում հաստատել են լուրը, բայց մանրամասներ չեն նշել:
Դեկտեմբերի 9-ին դոլարը շարունակել է թանկանալ, իսկ եվրոն թռիչքից հետո կտրուկ անկում է գրանցել: Արդյունքում դոլարի փոխարժեքը կազմել է 483 դրամ, եվրոյինը՝ 513, ռուբլունը՝ 7 դրամ 67 լումա, ֆունտինը՝ 609 դրամ։
Դեկտեմբերի 10-ին Շիրակում, Կոտայքում, Արագածոտնում, Արարատում, Արմավիրում եւ Վայոց ձորում երեկոյան ժամերին թույլ տեղումներ են սպասվում: Օդի ջերմաստիճանը կբարձրանա 8-10 աստիճանով: Երեւանում վաղը երեկոյան ժամերին թույլ տեղումներ կլինեն:
