Արցախում դիրքերից մեկում, դեկտեմբերի 8-ին նախնական տվյալով ծառայակցի վրա նռնակ նետած, ապա ինքնասպան եղած ժամկետային զինծառայող Ալբերտ Պոստոլոկյանի հոգեհանգիստը տեղի կունենա այսօր` դեկտեմբերի 10-ին, Տավուշի մարզի Դիլիջան քաղաքում:
Հարազատներին դեռեւս պարզ չի, թե ինչու է Ալբերտը նման քայլի դիմել: Զինծառայողին ճանաչողները նրան բնութագրում են որպես հանգիստ, խելոք երիտասարդ:
Նշենք, որ Ալբերտը 20 տարեկան էր, բանակ էր զորակոչվել հուլիսին: Նրա ընտանիքն ապրում է ծայրահեղ ծանր սոցիալական պայմաններում, տունը տարիներ առաջ ամբողջությամբ այրվել էր: Հոգեհանգստի եւ հուղարկավորության ծախսերը հոգալու համար Դիլիջանի քաղաքապետարանը գումար է հատկացրել:
Ըստ Քննչական կոմիտեի տարածած հաղորդագրության` N զորամասի պահպանության տեղամասի մարտական դիրքի, առույգ հերթափոխի դիտորդ, նռնակաձիգի օգնական, ժամկետային զինծառայող, շարքային Ալբերտ Պոստոլոկյանը դեկտեմբերի 8-ին ժամը 02:10-ի սահմաններում ծառայողական նպատակով իրեն տրամադրված նռնակը նետել է գետնատնակի մուտքի ուղղությամբ: Նռնակի պայթյունից բեկորային վիրավորում է ստացել հերթափոխի՝ հանգստացող ավագ հրաձիգ, ժամկետային զինծառայող, շարքային Գառնիկ Տերտերյանը, որից հետո Ալբերտն իրեն ամրակցված ինքնաձիգից կրակոցներ է արձակել իր ծնոտի շրջանում եւ ստացած հրազենային վիրավորումից տեղում մահացել է:
Ձեռնարկվում են անհրաժեշտ քննչական գործողություններ՝ քրեական գործով բազմակողմանի, օբյեկտիվ եւ լրիվ հետազոտումն ապահովելու ուղղությամբ։