Բուլղարիայի Շումենի մարզի Խիտրինո գյուղում երկաթուղային վթարի պատճառված վնասի չափերը, որի հետեւանքով 5 մարդ է զոհվել, նույնպիսին են, ինչ տարերային աղետի ժամանակ: «ՌԻԱ Նովոստի»-ի փոխանցմամբ՝ այս մասին ասել է երկրի ՆԳ նախարարության գլխավոր քարտուղար Գեորգի Կոստովը:
«Տվյալ դեպքում խոսում ենք տրանսպորտային վթարի մասին, սակայն տեղի ունեցած պայթյունները զգալի նյութական վնաս են պատճառել»,- ասել է Կոստովը՝ նշելով, որ պայթյունի ալիքը ծայրահեղ կործանարար է եղել:
Սեղմված գազի ցիստերններ տեղափոխող գնացքը շաբաթ առավոտյան Խիտրինո գյուղի երկաթուղային կայարանի շրջանում ռելսերից դուրս է եկել: 26 ցիստերնից 23-ը գազով էին լցված, որոնցից մի քանիսը վթարի հետեւանքով պայթել են: Տարբեր տվյալներով վիրավորների թիվը կազմում է 12-ից մինչեւ 25 մարդ:
Վթարի վայրում աշխատում են հրշեջները եւ բժիշկները: Հրշեջ անվտանգության եւ բնակչության պաշտպանության գլխավոր տնօրինության պետ Նիկոլայ Նիկոլովը նշել է, որ վթարի վայրի մերձակայքում բնակվող մարդկանց տարհանել են, ոմանց՝ նույնիսկ հարկադրաբար, քանի որ բնակիչները չէին ցանկանում իրենց տները լքել:
Երկրի վարչապետի պաշտոնակատար Բոյկո Բորիսովը մեկնել է արտակարգ իրադրության վայր: Facebook-ի իր էջում նա քաղաքացիներին կոչ է արել տուժողների համար արյուն հանձնել, քանի որ հիվանդանոցների ունեցածը չի բավականացնում:
Տեղական լրատվամիջոցները հայտնում են, որ Խիտրինոյի բնակիչներն ահաբեկված են, շատերը պայթյունների ձայնից են արթնացել, որը տեղի է ունեցել վաղ առավոտյան, եւ կարծել են, թե երկրաշարժ է տեղի ունեցել կամ երկնաքար է ընկել: