Վանաձորի նախկին ավագանու անդամ Վահան Մխիթարյանը հրաժարվեց որեւէ պաշտոնական մեկնաբանություն տալ իր տնակի հրդեհի առաջացման պատճառների մասին, սակայն հարցազրույցից դուրս NEWS.am-ի թղթակցին նշեց, որ հնարավոր է՝ դիտավորյալ են հրդեհել տնակը:

Ինչ վերաբերում է տնակում հայտնաբերված զենք-զինամթերքին, ասաց, որ տեղյակ չէ, թե ինչպես են դրանք հայտնվել տնակում:

«Այստեղ ժամանակին ազատամարտիկներ են ապրել, հնարավոր են նրանցից»,- ասաց նա:

NEWS.am-ի թղթակցի հետ զրույցում Լոռու մարզի քննչական վարչության պետ Թաթուլ Շուշանյանը նշեց, որ տեղում աշխատում է քննչական խումբը, որոնք, սակայն, դեռեւս վախենում են մոտենալ ծխացող տնակին, հայտնաբերվել են մեծ քանակությամբ զինատեսակներ, որոնց մասին տեղեկատվություն կտա ավելի ուշ:

Չի բացառվում, որ այդտեղ այլ զենք զինամթերք լինի եւ նոր պայթյունի վտանգ առաջանա:

Ավելի վաղ NEWS.am-ը հայտնել էր, որ Վանաձորում, այսօր՝ դեկտեմբերի 10-ի գիշերը ժամը 06.30-ի սահմաններում, հրդեհ է բռնկվել քաղաքի ավագանու նախկին անդամ Վահան Մխիթարյանի տնակում, որը գտնվում է Ծիծեռնակ ճամբարի հարեւանությամբ՝ Վանաձոր հանգստի գոտում:

Զանգով դեպքի վայր հասած Վահան Մխիթարյանը տնակը հայտնաբերել է կրակների մեջ:

Հրշեջների կողմից հրդեհը մարելու ընթացքում պայթյուն է տեղի ունեցել եւ կասկածներ կան, որ տնակում զենք-զինամթերք է եղել:

Նշենք, որ Վահան Մխիթարյանը նախորդ երկու գումարման ավագանու անդամ էր, մշտապես աչքի էր ընկնում իր ընդդիմադիր կեցվածքով: