«Սասնա ծռերի» խմբի գործով կալանավորված անձանց մեծ մասի համար հարազատների հետ տեսակցության արգելանքը չի հանված: Այս մասին, այսօր՝ դեկտեմբերի 10-ին, Մարդու իրավունքների պաշտպանության օրվան նվիրված երթի ժամանակ լրագրողների հետ զրույցում նշեց «Հիմնադիր խորհրդարանի» ներկայացուցիչ Ալեք Ենիգոմշյանը:
Երթը կազմակերպել է «Հիմնադիր խորհրդարանը»:
«Իհարկե, չեն հարգվում «Սասնա ծռերի» իրավունքները՝ սկսած հարազատների հետ տեսակցության իրավունքի ոտնահարումից: Մենք գիտենք, որ վերջին օրերին, 1,5 տասնյակ կալանավորների նկատմամբ այդ արգելանքը հանվեց, բայց մեծամասնության համար այն դեռ մնում է: Այն մեղադրանքները, որ ներկայացված են, ըստ էության, եւս անօրինական են, եւ հետեւաբար իրավական առումով կալանավորվածները չունեն այն իրավունքները, որոնց պետք է հասու լինեին»,-ասաց նա:
Ենիգոմշյանը հայտարարեց, որ այսօր Հայաստանում կան քաղաքական պատճառներով կալանավորված բազմատասնյակ անձինք. «Հայաստանում ձեւական թղթի վրա այդ իրավունքները պաշտպանված են, բայց բազմատասնյակ քաղբանտարկյալների առկայությունը ցույց է տալիս, որ իրականում դա չկա, միայն թղթի վրա է: Մարդու իրավունքները ենթադրում են նաեւ արժանապատվության իրավունք: Մարդու իրավունքն է ունենալ ազատ եւ ինքնիշխան պետություն, իր երկրում ունենալ արժանապատիվ կյանք վարելու իրավունք: Այդ արժանապատիվ կյանքը նշանակում է ունենալ ստեղծագործելու հնարավորություն: Իսկ դրա համար պետք է քաղաքացու ֆիզիկական ամենատարրական պահանջները բավարարված լինեն, ինչը չկա մեր երկրում. Խոսքը սոցիալական արդարության, քաղաքական ազատությունների մասին է:
Եթե այդ տարրական իրավունքները չեն ամբողջացված, տվյալ երկրում ստեղծագործելու մարդու հնարավորությունը սահմանափակված է լինում:
ՀՀ-ում մարդու իրավունքները ոտնահարվում են, որովհետեւ իշխանությունների եւ նրանց արտաքին հովանավորների նպատակն է արգելք հանդիսանալ, որ ՀՀ քաղաքացին իր հայրենիքում լինի ազատ ու ստեղծագործ մարդ»,-իր խոսքն ամփոփեց նա: