Առաջին քաղաքական միավորումն ընտրություններից առաջ: «Լուսավոր Հայաստան», «Հանրապետություն», «Քաղաքացիական պայմանագիր» կուսակցություններն առաջիկա խորհրդարանական ընտրություններում հանդես կգան դաշինքով: Այսօր քաղաքական այս ուժերը համագործակցության հուշագիր են ստորագրել: Չի բացառվում, որ ընտրություններից հետո նաեւ մեկ միասնական կուսակցություն ստեղծվի: Դեռեւս հայտնի չէ, սակայն, թե ով կլինի քաղաքական նոր ուժի նախագահը: Էդմոն Մարուքյանը, Սասուն Միքայելյանն ու Արամ Սարգսյանն ասում են՝ իրենց համար կարեւոր է, որ միասին կարողանան փոփոխություններ բերել այս երկրում:
Կուսակցությունների ներկայացուցիչները չեն շտապում կանխատեսումներ անել ընտրություններում իրենց արդյունքի մասին: Նորաստեղծ դաշինքի ներկայացուցիչները նշել են, որ իրենց ժողովուրդն է ընտրելու, իսկ «Քաղաքացիական պայմանագիր» կուսակցության անդամ Նիկոլ Փաշինյանը կատակով հավելել է. «Լավ կլիներ 50+1 կամ 50+2»: Այստեղ չեն նշում նաեւ, թե հաղթանակի դեպքում ով է լինելու վարչապետի հավանական թեկնածուն: Հիշեցնենք, որ ամիսներ առաջ հանրահավաքի ժամանակ Նիկոլ Փաշինյանը հայտարարել էր, որ վարչապետի հավանական թեկնածուն ինքն է:
Ինչի՞ մենակ քյասիբի երեխեքը պիտի ծառայեն, թող մեծահարուստի երեխեքն էլ ծառայեն, որ հավասար լինի բոլորի համար: Պատգամավոր Առաքել Մովսիսյանը՝ Շմայսը, ծառայության հարցում անարդարության խնդիրը բարձրացրել է «Պահեստազորային պատրաստության համակարգի կատարելագործումը» թեմայով խորհրդարանական լսումների ժամանակ: Նրան նաեւ մտահոգել է հարցը, արդյո՞ք սահման մեկնող ուսանող բժիշկներն ի վիճակի են ծառայություն մատուցել, որ «աչքի տեղը ունքն էլ չհանեն»:
Արտաշատի ծննդատանն այսօր նորածնի մահվան դեպք է գրանցվել: Բուժկենտրոնից մեզ տեղեկացրել են, որ երեխան մահացած է ծնվել: Սակայն ծնողները երեխայի մահվան մեջ բժիշկներին են մեղադրում: Ծննդկանի ամուսինը մեզ հետ զրույցում պատմել է, որ 24-ամյա Հռիփսիմեին հիվանդանոց են տեղափոխվել առավոտյան ժամը 9-ին, նրա պտղաջրերը գնացել են, բայց բժիշկները չեն շտապել կեսարյան հատում անել: 8 ժամ անց երեխան բնական ճանապարհով ծնվելուց հետո մահացել է: Բժիշկները հարազատներին ասել են, որ նորածնի մահվան պատճառը պորտալարի կարճ լինելն է: Ծնունդն ընդունած բժշկի հետ առայժմ չի հաջողվել կապ հաստատել:
Նոյեմբերի 30-ին Արցախում վիրավորված զինծառայողներից Կարապետ Միքայելյանի եւ Քաջիկ Բադալյանի վիճակը շարունակում է մնալ միջին ծանրության: Հիշեցնենք, որ 19-ամյա Կարապետ Միքայելյանը գլխի թափանցող վիրավորում էր ստացել, Քաջիկ Բադալյանը՝ որովայնի թափանցող, գնդակային վիրավորում, վնասվել են նրա աղիները եւ աջ ազդրը: Իսկ նոյեմբերի 22-ին Արցախի մարտական դիրքերից մեկում վիճաբանության ժամանակ, նախնական տվյալներով, ծառայակցի կողմից հրազենային վիրավորում ստացած Ազնավուր Բալեյանի վիճակը դեռեւս ծայրահեղ ծանր է: Բալեյանը վերակենդանացման բաժանմունքում է, անգիտակից վիճակում, նա գլխի շրջանում հրազենային վնասվածք ունի: Ազնավուրը Գեղարքունիքի մարզի Ծովազարդ գյուղից է: Նրան վիրավորում հասցրած Ա.Ներսեսյանը ձերբակալված է:
Վրաերթ Երեւանում: Այսօր վաղ առավոտյան Հալաբյան-Մարգարյան փողոցների խաչմերուկում 61-ամյա Ալբերտ Գեւորգյանը «Mercedes» մակնիշի ավտոմեքենայով վրաերթի է ենթարկել 55-60 տարեկան տղամարդու: Տուժածին հիվանդանոց են տեղափոխել: Նրա վիճակը ծայրահեղ ծանր են գնահատում:
Ողբերգական դեպք Երեւանում: Ծառից կախված տղամարդու մարմին են գտել: Նախնական տեղեկություններով՝ նա ինքնասպան է եղել: Տղամարդու դին Աջափնյակ վարչական շրջանի փողոցներից մեկի տան բակում նկատել են անցորդները եւ ահազանգել ոստիկանություն:
Դեկտեմբերի 12-ին դոլարը շարունակել է թանկանալ, կտրուկ արժեւորվում է նաեւ ռուբլին: Արդյունքում դոլարի փոխարժեքը կազմել է 484 դրամ, եվրոյինը՝ 513, ռուբլունը՝ 7 դրամ 93 լումա, ֆունտինը՝ 610 դրամ։
Դեկտեմբերի 13-ին Շիրակում, Կոտայքում, Արագածոտնում, Արարատում, Արմավիրում եւ Վայոց ձորում երեկոյան ժամերին թույլ տեղումներ են սպասվում: Օդի ջերմաստիճանն էապես չի փոխվի: Երեւանում վաղը հնարավոր են թույլ տեղումներ:
