«Հզոր Թուրքիա» կուսակցության նախագահ Թունա Բեքլեւիչը եւ նույն կուսակցության փոխնախագահ Բայբարս Օրսեքը չեն այցելի Ծիծեռնակաբերդ։ Այս մասին նրանք հայտարարեցին հոկտեմբերի 29-ին տեղի ունեցած մամուլի ասուլիսի ժամանակ։
«Մենք չենք ուզում, որ հայ-թուրքական սահմանի բացումը, ինչի համար եւ այստեղ ենք, առնչվի այս թեմայի հետ։ Առաջին փուլում մենք պահանջում ենք հայ-թուրքական սահմանի բացում։ Մյուս թեմաները կշարունակվեն քննարվել ժամանակի ընթացքում։ Այս փուլում չենք ցանկանում, որ որեւէ բան պատճառ հանդիսանա սահմանի փակ մնալուն։ Իհարկե, մենք պետության քաղաքականության հետնամասում ենք, բայց 1915 թվականին ապրված Մեծ եղեռնի տված վնասներիը թե հայ, թե թուրք հասարակություններին շատ մեծ են եղել, եւ անկասկած այս թեման դեռ շատ պետք է քննարկվի։ Մենք քննարկման կողմնակից ենք եւ դրանից անհանգստություն չենք զգում։ Առաջ աստված, սահմանի բացումից հետո մի բաժակ թեյի շուրջ կքննարկենք նաեւ Հայոց ցեղասպանության հարցը»,- հավատացրեց Բեքլեւիչը։
«Մեր կուսակցության հիմնադրման օրից մենք Թուրքիայում ապրող հայերի կողքին ենք, եւ մենք էին, որ ամենամեծ հակազդեցությունը ցույց տվեցինք Հրանտ Դինքի սպանությունից հետո։ Հրանտ Դինքի սպանության պատճառով շատ վրդովված ենք։ Բնականաբար գիտենք, որ թուրքական դատարանները խնդիրներ ունեն։ Բայց հույս ունենք, որ դատական այս գործընթացը հետագայում ավելի է արագանալու»,- ավելացրեց Թունա Բեքլեւիչը։
Նշենք, որ «Հզոր Թուրքիա» կուսակցության ներկայացուցիչները Հայաստանում են 2 օրով։ Նրանք այն երիտասարդներն են, ովքեր հայտարարել էին, թե ի նշան բողոքի՝ հատել են հայ-թուրքական փակ սահմանը եւ մտել Հայաստանի տարածք։