Վերաքննիչ դատարանը հաստատել է Վալերի Պերմյակովի գործով բողոքի քննությունը։ Դատական նիստը նախագահող դատավոր Մհեր Արղամանյանը նշեց, որ վճիռը կկայացվի դեկտեմբերի 19-ին՝ ժամը 10-ին։
Նշենք, որ դեկտեմբերի 16-ին դատական նիստը տեւեց մոտ 2 րոպե։ Դատավորը համոզվել է, որ կողմերը միջնորդություններ չունեն, եւ գործընթացն ավարտված է համարել։
Հիշեցնենք, որ Վերաքննիչ դատարան էին դիմել Վալերի Պերմյակովի փաստաբանը եւ տուժողի իրավահաջորդի ներկայացուցիչները։ Նախորդ դատական նիստում ներկայացվեց Պերմյակովի հայտարարությունն այն մասին, որ ինքը հրաժարվում է բողոքից եւ չի ուզում մասնակցել դատական նիստին։ Սակայն փաստաբանի միջնորդությամբ որոշվել էր ստուգել ամբաստանյալի դիրքորոշումը։
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
