Անկարայում ԱՄՆ դեսպանությունը մինչեւ երեքշաբթի փակ կլինի հրաձգությամբ երկու միջադեպերի ֆոնին, այդ թվում՝ Ռուսաստանի դեսպանի սպանության: Այս մասին Twitter-ի պաշտոնական էջում հաղորդել է ամերիկյան դիվանագիտական ներկայացուցչությունը:
«Անկարայում ԱՄՆ դեսպանությունն ու Ստամբուլում եւ Ադանայում հյուպատոսություններն այսօր փակ են»,- ասված է հաղորդագրությունում:
Պետքարտուղարությունը հաստատել է Անկարայում ԱՄՆ դեսպանության մոտ հրաձգության մասին հաղորդագրությունը եւ հավելել, որ տուժածներ չկան, իսկ չարագործը ձերբակալված է: Պետքարտուղարության ներկայացուցիչը ՌԻԱ Նովոստիին պատմել է, որ Անկարայում դեսպանության մուտքի մոտ տղամարդը մի քանի անգամ կրակ է արձակել ատրճանակից:
Դրանից մի քանի ժամ առաջ ամերիկյան դեսպանության մոտակայքում հարձակում է իրականացվել Թուրքիայում ՌԴ դեսպան Անդրեյ Կառլովի վրա: Գործող նախագահ Բարաք Օբաման, նորընտիր նախագահ Դոնալդ Թրամփը եւ գործող պետքարտուղար Ջոն Քերրին դատապարտել են դեսպանի սպանությունը:
