Թուրքիայում հանգստանալ պատրաստվող ռուսաստանցիները պետք է լրջորեն կշռադատեն իրենց ծրագրերը՝ հաշվի առնելով երկրի իրավիճակը: Այս մասին հայտարարել է ՌԴ ԱԳ փոխնախարար Օլեգ Սիրոմոլոտովը՝ մեկնաբանելով Անկարայում դեսպան Անդրեյ Կառլովի սպանությունից հետո ռուսաստանցիների համար հնարավոր սպառնալիքները, փոխանցում է ՏԱՍՍ-ը:
«Կարծում եմ՝ յուրաքանչյուր ոք, ով պատրաստվում է Թուրքիա մեկնել, դա անելուց առաջ պետք է լավ մտածի, որովհետեւ գրեթե ամեն օր ահաբեկչություններ են տեղի ունենում»,- ասել է նա:
«Անկարայի ողբերգությունը ցույց է տալիս, որ զոհ կարող են լինել ինչպես քաղաքական գործիչները, այնպես էլ հասարակ մարդիկ: Ահաբեկչությունների մեծ մասի զոհերը հաճախ քաղաքացիական անձինք են, որոնք կապ չունեն ինչ-որ իրադարձությունների հետ, կամ ուժային կառույցների ներկայացուցիչներ են»,- ասել է Սիրոմոլոտովը:
Կառլովի մահից հետո աշխարհում ստեղծված իրավիճակը մեկնաբանելով՝ նա նշել է, որ ահաբեկչությունների թվի աճը վկայում է աշխարհում տեղի ունեցող փոփոխությունների մասին:
«Աշխարհն սկսում է փոխվել: Եթե նախկինում ահաբեկչություն էր իրականացվում, այդ ողբերգությունը ամիսներով քննարկվում էր: Իսկ այժմ օրական մի քանիսն է տեղի ունենում, դա սովորական է դառնում: Ահա, թե որն է ամենասարսափելի ողբերգությունը»,- ասել է նա:
