Անկարան կանի հնարավոր ամեն բան Թուրքիայում ՌԴ դեսպանի սպանության հետաքննության համար, մեղավորները կկրեն արժանի պատիժը։ Այս մասին ասել է Թուրքիայի ԱԳ նախարար Մեւլութ Չավուշօղլուն ՌԴ արտգործնախարար Սերգեյ Լավրովի հետ բանակցությունների մեկնարկին, հայտնում է ՏԱՍՍ–ը։
«Մենք կանենք հնարավոր ամեն բան, որպեսզի պարզենք այդ հանցագործության բոլոր հանգամանքները եւ բացահայտենք նրանց, ովքեր կանգնած են դրա հետեւում։ Եվ նրանք, ովքեր կանգնած են այդ հանցագործության հետեւում, կկրեն արժանի պատիժը»,– ասել է նա։
Չավուշօղլուի խոսքով՝ Անկարայում փողոցը, որտեղ գտնվում է ՌԴ դեսպանատունը, կվերանվանվի սպանված դեսպան Անդրեյ Կարլովի անունով։ «Մենք որոշել ենք, ինձ այդ մասին տեղյակ է պահել Թուրքիայի վարչապետը, որ կհավերժացնենք պարոն Անդրեյ Կարլովի հիշատակը։ Նկատի ունեմ Ա. Կարլովի անունով կվերանվանենք փողոցը, որտեղ գտնվում է ՌԴ դեսպանատունը»,– ասել է նախարարը։
Նշենք, որ Ռուսաստանի եւ Թուրքիայի ԱԳ նախարարները դեկտեմբերի 20-ին ծաղիկներ էին դրել ՌԴ ԱԳՆ ընդունելության տան սրահում՝ ի հիշատակ սպանված ռուս դիվանագետի։ Նախարարները 1 ր լռությամբ հարգել են Կարլովի հիշատակը, հայտնում է «ՌԻԱ Նովոստի»–ն։
Ավելի վաղ հայտնի էր դարձել, որ Թուրքիայի ԱԳ նախարար Մեւլութ Չավուշօղլուն չեղարկել է դեկտեմբերի 20-21–ը պլանավորած այցը Ուկրաինա։