Կառավարության առաջարկությամբ Ազգային ժողովն այսօր արտահերթ նիստ էր հրավիրել: Գործադիրն առաջարկել էր քննարկել «Պետական տուրքի մասին» օրենքում փոփոխությունների նախագիծն ու միջազգային մի քանի պայմանագիր, բայց պատգամավորներն ակտիվորեն տնտեսության վիճակն են քննադատել: Կառավարությունը ցանկանում է միջազգային նոր վարկեր վերցնել: Դա անհանգստացնում է Նիկոլ Փաշինյանին. նախկին վարկերն էլ չեք մարել, պետական պարտքի սպասարկումն էլ հսկայական գումարներ է պահանջում:
Փաշինյանի համոզմամբ՝ բոլոր հիմքերը կան պնդելու, որ Հայաստանն ընկել է վարկային տենդի մեջ, եւ իրավիճակը դուրս է գալիս կառավարության վերահսկողությունից: Նրա համար նաեւ զարմանալի է կառավարության մոտեցումը, թե վստահում են, վարկ են տալիս: Ասում է՝ վարկ են տալիս, որ հին վարկերը մարեն, ինչո՞ւ են ուրախանում: Հին վարկերի տնօրինման հետ կապված էլ պատգամավորը դժգոհություն ունի: Փաշինյանը նաեւ ցավով արձանագրել է, որ պարտք վերցնելու՝ ժողովրդի շրջանում տարածվող սովորությունը պետությանն է փոխանցվում:
Նաիրա Զոհրաբյանին զարմացրել է ֆինանսների փոխնախարարի այն հայտարարությունը, թե տնտեսական աճն ու անկումը միայն հաջողությունից են կախված: Պատգամավորը գրագետ տնտեսական քաղաքականության, վստահելի իշխանության պակաս է տեսնում: Եվ եթե հույսը դրել են միայն հաջողության վրա, առաջարկել է. գուցե կառավարության անդամները մոմ թափողի, գրբացի մոտ գնան:
Ի դեպ՝ խորհրդարանի նիստերի դահլիճում այսօր բավական ցուրտ է եղել: Ազգային ժողովի փոխխոսնակը խնդրել է թեյ հյուրասիրել կանանց, հետո էլ խոստացել է առաջարկել, որ դահլիճն ավելի լավ ջեռուցեն:
Կառավարությունը «խորը մտքերի» կարիք ունի: Գործադիրը Ռազմավարական նախաձեռնությունների կենտրոն է ստեղծել, որի համար նաեւ հիմնադրամ ստեղծելու: Կենտրոնը կառավարությանն աջակցելու է զարգացման երկարաժամկետ ծրագրեր, պետություն-մասնավոր հատված գործընկերության ծրագրեր մշակել: Կարեն Կարապետյանը մեծապես կարեւորում է այս կառույցի ստեղծումը:
Օրերս վարչապետը մարզերում էր: Կառավարության անդամներին այսօր տեղեկացրել է, որ այցելությունների ժամանակ բացահայտել է. համայնքների բյուջեի, բնակչության թվի համեմատությունները բավական լուրջ տեղեկություն են տալիս, դրանց հիման վրա հնարավոր է կանխատեսում անել եւ նախանշել այն հորիզոնները, որ համայնքային բյուջեները կարող են ունենալ:
Հայաստանում դպրոցական սննդի ֆոնդ կստեղծվի: Ծրագիրը մեր երկրում իրականացվում է 2010 թվականից, Ռուսաստանի կառավարության տրամադրած միջոցներով: Կրթության նախարարն այսօր ներկայացրել է ծրագրում ընդգրկվածների թվային պատկերը՝ նշելով, որ աստիճանաբար ծրագրում ներառվելու են հանրապետության 1-4-րդ դասարանների բոլոր աշակերտները: Վերջնաժամկետը 2027 թվականն է, վարչապետը ցանկանում է արագացնել ծրագրի ընթացքը: Լրացել է Կարեն Կարապետյանի պաշտոնավարման 100 օրը: Գործադիրի նիստից հետո լրագրողները Սուրեն Կարայանից հետաքրքրվել են. վարչապետը կատարում է խոստումնալից հայտարարությունները: Նախարարի կարծիքով՝ այո:
Կառավարության անդամները շարունակում են ամփոփել տարին: Այսօր հերթն արդարադատության նախարարինն էր: Արփինե Հովհաննիսյանն անդրադարձել է բուռն քննարկումների առիթ դարձած ապօրինի հարստացման քրեականացման հարցին: Նախարարը վստահ է, որ այս կապակցությամբ քաղաքական կամքի թեմայից խոսելը սխալ է եւ անազնիվ։ Ասում է՝ չենք հայտարարել, որ վաղվանից օրենքն ուժի մեջ կմտնի, որպեսզի մեզ չմեղադրեն դիվիդենտ հավաքելու մտադրության մեջ: Լրագրողները խնդրել են մեկնաբանել նաեւ ՊՊԾ գնդի գրավման ժամանակ տեղի ունեցած բռնությունների մասին նախագահ Սերժ Սարգսյանի հայտարարությունը: Արփինե Հովհաննիսյանը նախ կոռեկտ չի համարել մեկնաբանել երկրի ղեկավարի խոսքերը, բայց նշել է, իր կարծիքով, դրանց էության մասին:
Ռուսաստանում 18 մարդու կյանք խլած ողբերգական վթարի մասնակից վարորդ Հրաչյա Հարությունյանի մասին. նախարարի փոխանցմամբ՝ այս երկրում 6 տարի եւ 9 ամիս ժամկետով ազատազրկման դատապարտված Հարությունյանի հարցն այս պահին ռուսական իրավասու մարմինների գործունեության տիրույթում է: Հայկական կողմը պարբերաբար գործով հարցումներ է ուղարկում ռուսաստանցի գործընկերներին, սակայն Հարությունյանին Հայաստանին արտահանձնելու հարցում խոչընդոտներ կան: Հիշեցնենք, որ ավելի վաղ Արփինե Հովհաննիսյանը հայտնել էր, որ Հրաչյա Հարությունյանը կարող է հայկական կողմին արտահանձնվել 2016 թվականին:
Հայ-ադրբեջանական սահմանագծին այս տարվա վերջին դիտարկումն է անցկացվել: ԵԱՀԿ գործող նախագահի անձնական ներկայացուցչի գրասենյակը դիտարկում է անցկացրել Տավուշի մարզի Բերդավան եւ ադրբեջանական Քեմեռլի գյուղերի մերձակայքում: Մինչ դիտարկումը սկսելը Տավուշի փոխմարզպետը ԵԱՀԿ-ի ներկայացուցիչներին է ներկայացրել սահմանամերձ հատվածներում տիրող իրավիճակը: Անդրադարձ է եղել, մասնավորապես, ադրբեջանական զինուժի կողմից հայ խաղաղ բնակչության եւ սահմանամերձ ավտոճանապարհների ուղղությամբ արձանագրված կրակոցներին: Կառույցի գործող նախագահի անձնական ներկայացուցչի դաշտային օգնականները խոստացել են այդ տվյալները ներառել իրենց ամփոփիչ զեկույցներում: Իսկ սահմանագծին դիտարկման ընթացքում զինադադարի խախտման դեպք չի արձանագրվել:
Սպիտակում, նախնական տվյալներով, 5 եւ 7 տարեկան դուստրերին խեղդամահ անելուց հետո ինքնասպան եղած Մարինե Հովհաննիսյանին ու երեխաներին այսօր Շիրակի Կրասար գյուղում հողին են հանձնել: Հայրը փոքրիկների եւ նախկին կնոջ հուղարկավորությանը ներկա չի եղել: Կնոջ համագյուղացիներից մեկը պատմել է, որ Մարինեն խելացի, կրթված, լավ մարդ էր: Նա կասկածում է, որ կինը կարող էր հոգեկան խնդիրներ ունենալ, հակառակ դեպքում չէին թողնի դպրոցում դասավանդել: Հիշեցնենք, որ Մարինե Հովհաննիսյանի դին՝ կախված վիճակում, իսկ երեխաներին ննջասենյակում մահացած են գտել դեկտեմբերի 19-ին: Նախնական տվյալներով՝ մայրը քնած ժամանակ խեղդամահ է արել երեխաներին, իսկ հետո ինքնասպան եղել:
Ամուսինը կանխել է կնոջ ինքնասպանության փորձը: Գեղարքունիքի մարզի Սոթք գյուղի բնակչուհին փորձել է անասնագոմում կախվելու միջոցով ինքնասպան լինել, սակայն ամուսինը նկատել է եւ օգնության կանչել հարեւաններին: Դեռեւս պարզ չէ, թե ինչն է եղել նման քայլի դիմելու պատճառը: Ինքնասպանության փորձ կատարած կինը երկու անչափահաս երեխա ունի:
Երեկվա նահանջից հետո դոլան ու եվրոն այսօր ամրապնդել են դիրքերը: Արդյունքում դեկտեմբերի 22-ին դոլարի փոխարժեքը կազմել է 481 դրամ, եվրոյինը՝ 503, ռուբլունը՝ 7 դրամ 92 լումա, ֆունտինը՝ 594 դրամ:
Դեկտեմբերի 23-ին հանրապետության տարածքում սպասվում է առանց տեղումների եղանակ: Օդի ջերմաստիճանն առաջիկա օրերին էականորեն չի փոխվի: Երեւանում նույնպես վաղը տեղումներ չեն սպասվում:
