Բնապահպանության նախարարի ամանորյա նվերը՝ թունավոր ջուր: Նախարարության 30-ամյակին նվիրված հոբելյանական միջոցառման ժամանակ Արծվիկ Մինասյանին այսպես են շնորհավորել բնապահպանական ակտիվիստները: «Սեղանի խմելու այլընտրանքային ջուրը» հավաքել են Հայաստանի հանքերի պոչամբարներից:
Մինչ տոնական միջոցառումը Արծվիկ Մինասյանը նաեւ ամփոփել է բնապահպանական տարին: Շատ ասելիք չի ունեցել, հիմնականում թվեր է ներկայացրել՝ թղթից, քանի որ այս նախարարությունը կարճ ժամանակ է ղեկավարում: Դրա համար հանդիպումը սկսել է՝ շնորհակալություն հայտնելով իր նախորդին: Հետո արդեն ներկայացրել է հիմնականում առանց իր մասնակցության կատարված աշխատանքները: Ձկնաբուծություն, անտառտնտեսություն, ապօրինի ստորգետնյա ջրերի հորատանցքեր եւ այլն: Իսկ կառավարման համակարգի օպտիմալացումը նաեւ բնապահպանության նախարարություն է հասել. այստեղ ե՛ւ աշխատակազմի, ե՛ւ սպասարկող մեքենաների կրճատումներ կլինեն, պետության միջոցներն էլ կխնայեն:
Ինչպես ասում են՝ լավ է ուշ, քան երբեք: Կապանում ծննդկանի մահվան դեպքից հետո որոշել են վեցամսյա ժամկետում երկրի բոլոր մանկաբարձ-գինեկոլոգների թեստավորում անցկացնել: Առողջապահության նախարարն ասում է՝ թեստավորում չանցած մասնագետների գործունեությունն առայժմ չեն կարող կասեցնել, բայց դրա համար էլ օրենքում փոփոխություններ կարվեն:
Օրենսդրական փոփոխություններ կարվեն նաեւ դեղորայքի շուկան կարգավորելու համար: Դեղագործական կազմակերպությունները բողոքում են, որ իրենց տուգանում են չգրանցված դեղորայք վաճառելու համար, մինչդեռ դրանք ներկրողներից ձեռք են բերում օրինական հիմունքով: Լեւոն Ալթունյանն արձագանքում է. չի կարող բերողը մեղավոր լինել, վաճառողը՝ ոչ, նա պարտավոր է ստուգել օրինականության բոլոր փաստաթղթերը եւ վերցնել միայն օրինական ներմուծված դեղերը:
Ոլորտում մեծ խնդիր է նաեւ պետպատվերի հարցը: Այո՛, պետպատվերի համար տրամադրվող գումարները քիչ են, այո՛, դրանք շուտ են ավարտվում, կփորձեն գտնել պակասող միջոցները: Նաեւ ծախսերի հաշվարկ կկատարեն: Նախարարը հիվանդանոցներին չհավատալու առիթ առայժմ չունի, բայց կանխարգելիչ քայլեր կձեռնարկեն. գերմանացի տանտիրուհու նման «գրոսբուխ» կվարեն՝ ծախսերը հասկանալու համար:
Սփյուռքի նախարարությունը բացահայտումներ է արել. պարզվում է՝ աշխարհում ավելի շատ հայեր կան, քան Հայաստանում էին պատկերացնում: Բոլորովին վերջերս հայկական համայնքներ են «հայտնաբերել» եւս 2 երկրում. Կոստա Ռիկայում 400 հայ է ապրում, Նիկարագուայում՝ 380: Հրանուշ Հակոբյանը նաեւ այլ թվեր է ներկայացրել. այս տարի 516 սիրիահայ է Հայաստան տեղափոխվել: Հիմա արդեն սիրիահայերի թիվն այստեղ 22 հազար է: Նրանց ընտանիքներում արդեն շուրջ 250 երեխա է ծնվել:
Նախարարը նաեւ հայ աղջիկներին գովելու առիթը բաց չի թողել. ասում է՝ խորհրդային տարիներին սփյուռքից, հատկապես՝ Սիրիայից ու Լիբանանից գալիս էին, տանում մեր աղջիկներին, հիմա հայրենիք են տեղափոխվում ու այստեղ ամուսնանում: Հրանուշ Հակոբյանը հստակ օրինակներով է խոսել: Ընդգծել է հատկապես Ֆրանսիայից մի անկրկնելի տատիկի հետ ծանոթանալու մասին:
2017 թվականը Սփյուռքի նախարարությունն Արցախի տարի է հայտարարել։ Ուզում են եւս մեկ անգամ բոլորի ուշադրությունը կենտրոնացնել Լեռնային Ղարաբաղի ուղղությամբ, հատկապես, որ ապրիլյան իրադարձություններն ապացուցեցին. միավորվեցինք եւ ավելի հզոր դարձանք ուժով եւ հոգով:
Կաշառքից ու բացահայտումներից էր խոսում, հենց ինքն էլ բռնվեց: Ազգային անվտանգության ծառայությունն այսօր հաղորդագրություն էր տարածել, որ բժշկասոցիալական փորձաքննության գործակալությունում ձեւավորվել եւ տեւական ժամանակ կոռուպցիոն սխեմա է գործել, որի միջոցով պաշտոնատար անձինք կաշառք են ստացել ու փոխանցել իրենց վերադասներին: Պարզվում է՝ կաշառք ստանալու կասկածանքով ձերբակալվել է աշխատանքի եւ սոցիալական հարցերի նախարարության պաշտոնյա Արմեն Սողոյանը: Հետաքրքիր է, որ շաբաթներ առաջ Սողոյանն ասուլիս էր հրավիրել եւ լուրջ դեմքով խոսել ոլորտում կոռուպցիոն ռիսկերի մասին: Նա նաեւ նշել էր բացահայտված չարաշահումների, պաշտոնազրկումների, բժիշկներին հայտարարված նկատողության մասին: Իր մասին, սակայն ,մոռացել էր: Քրեական գործ է հարուցվել, խուզարկության արդյունքում 2 մլն 547 հազար դրամ եւ 600 դոլար է հայտնաբերվել, գերակշռող մասը՝ ծրարված:
Ի՞նչ կբացահայտվի Տու-154-ի ինքնագրիչ սարքերի վերծանման արդյունքում: Կործանված օդանավի առաջին «սեւ արկղը» դուրս են բերել Սեւ ծովի հատակից: Մասնագետները հույս ունեն դրա օգնությամբ պարզել ողբերգության պատճառները: Առայժմ դիտարկվում են օդանավի անսարքության, շարժիչում կողմնակի առարկայի հայտնվելու, օդաչուների սխալի եւ անորակ վառելիքի վարկածները: Հատուկ ծառայությունները շարունակում են պնդել. ահաբեկչության նախանշաններ չկան: Որոնողական աշխատանքների վայրում նաեւ շուրջ ութ տասնյակ մարդու մարմին են գտել: Հիշեցնենք, որ օդանավում 92 մարդ է եղել. 84 ուղեւոր եւ անձնակազմի 8 անդամ: Սիրիա մեկնող օդանավում է եղել նաեւ Ալեքսանդրովի անվան համույթի հայազգի մեներգիչ, «Օպերայի ուրվականը» մյուզիքլի աստղ, տենոր Հովհաննես Գեորգիյանը: Մարդ, որը, ինչպես գործընկերներն են բնորոշում, պարզապես սիրում էր կյանքը:
Ինքնասպանության փորձ են կանխել: Պարզվում է՝ 39-ամյա Արման Բաղդասարյանն առողջական խնդիրներ ունի, նաեւ սոցիալական ծանր պայմաններում է ապրում: Տղամարդը խնդիրների լուծման այլ տարբերակ չի գտել եւ որոշել է վերջ տալ կյանքին: Բաղդասարյանը փորձել է նետվել Կիեւյան կամրջից: Նրան տեղում հոգեբանական օգնություն են ցուցաբերել:
Դեկտեմբերի 27-ին նույնպես հիմնական փոխարժեքներն աճել են: Արդյունքում դոլարի փոխարժեքն այսօր կազմել է 483 դրամ, եվրոյինը՝ 505, ռուբլունը՝ 7 դրամ 95 լումա, ֆունտինը՝ 593 դրամ:
Դեկտեմբերի 28-30-ը հանրապետության տարածքում արդեն սպասվում է առավելապես առանց տեղումների եղանակ: Օդի ջերմաստիճանը դեկտեմբերի 29-ի գիշերը կնվազի 2-3 աստիճանով, 30-ի ցերեկը՝ նույնքան կբարձրանա: Երեւանում վաղը տեղումներ չեն սպասվում: