2016թ. Արցախ այցելած զբոսաշրջիկների թվի նվազում կա: Այս մասին այսօր՝ դեկտեմբերի 28-ին, լրագրողների հետ հանդիպմանն ասել է ԼՂՀ ԱԳՆ նախարար Կարեն Միրզոյանը:
«Չնայած տարին դեռ չի ավարտվել, դեռ թվերն ամփոփվում են, բայց այսօրվա դրությամբ, անցած տարվա համեմատությամբ, ունենք 17 տոկոսի անկում: Այսինքն՝ մոտավորապես 14 հազար այցելու ունենք այս տարի՝ նախորդ տարվա 16.5 հազարի համեմատ: Սակայն, այցելուների քանակի նվազումը որեւէ առնչություն չունի Ադրբեջանի որդեգրած քաղաքականության հետ: Հիմնական պատճառը ապրիլյան իրադարձություններն են. շատ մարդիկ ուղղակի նախընտրել են Արցախ չայցելել՝ հաշվի առնելով անվտանգության պայմանները»,-ասել է նա:
Նախարարը նշել է, որ Արցախի իշխանությունները շարունակում են աշխատանքներն ուղղված Արցախի զբոսաշրջային գրավչությունն աշխարհին ներկայացնելու համար. «Այդ առումով սերտորեն համագործակցում ենք Արցախի Էկոնոմիկայի նախարարության տուրիզմի վարչության հետ: Այդ ուղղությամբ որպես հետաքրքիր քայլ աշնանը Բրյուսելում տեղի ունեցած պրեզենտացիան էր՝ Արցախի տուրիզմի հնարավորությունների մասին: Մենք մեր գործընկերների հետ համագործակցությունը շարունակելու ենք, որի նպատական է լինելու Արցախի մասին ճշմարտությունը բարձրաձայնելու եւ գործնական կապերի հաստատումն ու տարածումը»:
