Վարդան Օսկանյանի գլխավորած «Համախմբում» կուսակցությունը գոհ է 2017-ի ապրիլի 2-ին կայանալիք խորհրդարանական ընտրություններից առաջ այլ քաղաքական ուժերի հետ ընթացող նախնական քննարկումներից:
Այս առնչությամբ, «Համախմբման» տարածած հայտարարության մեջ ասվում է.
«Հունվարի 9-ին տեղի ունեցավ «Համախմբում» կուսակցության վարչության հերթական նիստը:
Օրակարգում ընդգրկված էին ընթացիկ, նախընտրական քարոզարշավի նախապատրաստության, ինչպես նաեւ այլ ուժերի հետ բանակցությունների ընթացքին վերաբերող հարցեր:
Տրվեցին կոնկրետ հանձնարարականներ: Վարչությունը բավարար գնահատեց այլ քաղաքական ուժերի հետ ընթացող նախնական քննարկումները: Միաժամանակ, որոշում կայացվեց ավելի ինտենսիվ դարձնել դրանք՝ վերջնական որոշումների հանգելու նպատակով:
Վարչությունը նաեւ որոշում կայացրեց ստեղծել բանակցող խումբ: Վարչությունը լիազորեց կուսակցության փոխնախագահներ Ստեփան Մարգարյանին եւ Էլինար Վարդանյանին, ինչպես նաեւ կուսակցության խորհրդի համակարգող Անդրանիկ Թեւանյանին ակտիվ խորհրդակցություններ անցկացնել քաղաքական, հասարակական ուժերի եւ այլ շրջանակների հետ»:
