Մարդու իրավունքների եվրոպական դատարանը (ՄԻԵԴ) վճռել է, որ Շվեյցարիայի իշխանությունների որոշումը՝ մուսուլման աղջիկներին լողի դասերի ուղարկել տղաների հետ, չի խախտում աշակերտուհիների կրոնական իրավունքները, փոխանցում է BBC-ի ռուսական ծառայությունը:
ՄԻԵԴ-ը որոշել է, որ չնայած նման պահանջները կարելի է գնահատել որպես կրոնական դավանանքի ազատությանը որոշակի միջամտություն, բայց դրանք այդ ազատության որեւէ լուրջ խախտում չեն առաջացնում:
Դատարանի որոշման մեջ նշված է, որ Շվեյցարիայի իշխանությունները գործել են օրենքի շրջանակում, որն ուղղված է օտարերկրյա ծագմամբ աշակերտներին հասարակական մեկուսացումից պաշտպանելուն:
Բողոքը դատարան էին ներկայացրել թուրքական ծագմամբ երկու քաղաքացիներ, որոնք հրաժարվել էին իրենց աղջիկներին ուղարկել լողի դպրոցական պարտադիր դասերին:
Արդյունքում 2010 թվականին այդ ծնողներին տուգանել էին մոտ 1,3 հազար եվրոյով ծնողական պարտականությունների խախտման համար: Դրանից հետո ծնողները ՄԻԵԴ էին դիմել: