Մայիսի 31-ից կալանքի տակ գտնվող, Ժիրայր Սեֆիլյանի հետ համագործակցությամբ ապօրինի զենք, զինամթերք պահելու մեջ մեղադրվող Ներսես Պողոսյանը շարունակում է հացադուլը: Այս մասին այսօր` հունվարի 11-ին, NEWS.am-ի հետ զրույցում ասաց նրա շահերի պաշտպան Արայիկ Պապիկյանը՝ նշելով, որ իր պաշտպանյալն արդեն 27 օր է՝ հացադուլի մեջ է:
«Երեկ եմ տեսակցել, շատ հյուծված, նիհարած եւ գունատ էր: Պարբերաբար բժիշկներ են այցելում, ճնշումը 60/90 է: Ես նրան խնդրեցի, որ դադարեցնի հացադուլը, բայց վճռական է տրամադրված»,- ասաց նա:
Արայիկ Պապիկյանն նշեց, որ Ներսես Պողոսյանի մայրը եւ եղբայրը եւս տեսակցել են նրան եւ խնդրել, որ հացադուլը դադարեցնի. «Փոխարենը ասում է, որ շարունակելու է հացադուլը եւ մի քանի օրից էլ ջրադուլ է հայտարարելու: Ես վաղն էլ եմ տեսակցելու նրան, կփորձեմ համոզել, որ գոնե այդ քայլին չգնա»,-ասաց պաշտպանը:
Ներսես Պողոսյանը բողոքում է իր քրեական գործի դեմ եւ պահանջում է իրեն ազատ արձակել:
Նշենք, որ Ներսես Պողոսյանն ամուսնացած է, երեք անչափահաս երեխա ունի:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարատվել է, գործն ուղարկվել է դատարան: