Առաջիկա խորհրդարանական ընտրություններին մասնակցելու վերաբերյալ տարբեր ուժերի հետ քննարկումներ է սկսել «Սիլ» կոնցեռնի նախագահ, նախկին պատգամավոր Խաչատուր Սուքիասյանը։ Այս տեղեկությունը հաստատել է նաեւ նրա մամուլի խոսնակ Աննա Մկրտչյանը։

Թե որ քաղաքական ուժի կամ դաշինքի ցուցակում կհայտնվի գործարարը, դեռ հստակ տեղեկություն չկա։ Հայտնի է, որ քննարկումները ընթանում են նաեւ ընդդիմադիր Հայ ազգային կոնգրեսի հետ, մինչդեռ երբ ԱԺ պատգամավոր Նիկոլ Փաշինյանը հիմնադրեց «Քաղաքացիական պայմանագիր» կուսակցությունը, կարծիքներ հնչեցին, թե կուսակցության թիկունքում Խաչատուր Սուքիասյանն է եւ այս միջոցով էլ նա մտնելու է խորհրդարան։ Նշենք, որ «Քաղաքացիական պայմանագիր», «Լուսավոր Հայաստան» եւ «Հանրապետություն» կուսակցությունները ընտրություններին մասնակցելու են «Ելք» դաշինքով։ Թե որքանով է հավանական, որ այս դաշինքում կլինի Խաչատուր Սուքիասյանը, NEWS.am-ը փորձել է պարզել Նիկոլ Փաշինյանից։

Պարոն Փաշինյան, երբ «Քաղաքացիական պայմանագիր» կուսակցությունը հիմնադրվեց, խոսակցություններ կային, որ կուսակցության հետ այս կամ այն կերպ առնչություն ունի Խաչատուր Սուքիասյանը։ Որքանո՞վ կապ ունի կուսակցության հետ եւ, ամեն դեպքում, հնարավո՞ր է՝ Սուքիասյանը ընդգրկվի «Ելք» դաշինքում։

Խաչատուր Սուքիասյանի հետ համագործակցության հայտնի պատմություն ունենք 2008 թվականին, նույնիսկ ինչ-որ ժամանակ միասին եղել ենք «Երեւան կենտրոն» քրեակատարողական հիմնարկում, այսինքն՝մեր անձնական հարաբերությունների պատմությունը որեւէ մեկի համար գաղտնիք չէ: Հիմա սրանից բխող մի քանի հարց կարող է լինել՝ «Քաղաքացիական պայմանագիր» կուսակցության հիմնադրում, «Քաղաքացիական պայմանագիր» կուսակցության քաղաքական բովանդակության ստեղծում, քաղաքական կուրսի որոշում եւ ֆինանսավորում, հիմա այս կետերից որեւէ մեկի հետ Խաչատուր Սուքիսյանը առնչություն ունեցե՞լ է, թե՞ չի ունեցել, այս գործընթացներից որեւէ մեկին մասնակցություն ունեցե՞լ է, թե ոչ. ոչ, չի ունեցել։ Սա է ամբողջ ճշմարտությունը։

Ինչ վերաբերում է հետագային, կա երկու կոմպոնենտ. արդյոք Խաչատուր Սուքիասյանը հետաքրքրվա՞ծ է այս դաշինքի գործընթացներին մասնակցելով, եւ արդյոք դաշինքը հետաքրքրվա՞ծ է Խաչատուր Սուքիասյանին այս գործընթացներում ներգրավվելով։ Այս երկու հարցերից որեէ մեկի պատասխանը այս պահին ես չունեմ։