2017 թվականը բավական ծանր տարի է լինելու. կառավարության՝ այս տարվա առաջին նիստում ազդարարել է վարչապետ Կարեն Կարապետյանը: Նա հետաքրքրվել է, թե ինչպես են հանգստացել կառավարության անդամներն ու հարցրել. արձակուրդները երկար չէ՞ին: Իսկ առաջին նիստի առաջին հանձնարարականը վերաբերում էր ներքին արտադրության խթանմանը: Հարկավոր է մեծացնել տեղական ապրանքների իրացման ծավալները, ներմուծումը փոխարինել տեղական արտադրությամբ, բայց այնպես անել, որ տնտեսական մրցակցության սկզբունքները չխախտվեն:
Պետք է նաեւ կարողանանք հնարավորինս էժան էլեկտրաէներգիա արտադրել ու շահավետ վաճառել: Առաջիկայում սպառման լայն շուկաներ ենք ունենալու. մի քանի տարի անց շահագործման կհանձնվեն դեպի Իրան եւ Վրաստան էլեկտրահաղորդման գծերը, եւ կկարողանանք ավելի հեշտ ու ավելի շատ արտահանել:
Կառավարությունում որոշել են ուսումնասիրել, թե որքան գազ են սպառում անապահով ընտանիքները: Արտեմ Ասատրյանը հիշեցրել է, որ անապահովների համար արտոնյալ սակագին է սահմանված՝ տարեկան 600 խ.մ.-ի սահմաններում: Այդ պատճառով առաջարկում են այսուհետ ընտանիքի անապահովությունը գնահատելիս հաշվի առնել նաեւ րանց կողմից գազի սպառման ծավալները: Կարեն Կարապետյանն այս վերահսկողությունը տեղին է համարում, քանի որ արդեն որոշ բացահայտումներ են արել:
Քննարկված մեկ հարց էլ վերաբերել է կրթության ոլորտին. վարչապետը հանձնարարել է ուսումնասիրել դպրոցների պայմանները եւ առաջարկներ ներկայացնել, թե ինչպես կարելի է բարելավել կրթական գործընթացի կազմակերպումը:
Կառավարությունը շարունակում է օպտիմալացումն ու պետության միջոցների տնտեսումը: Տարածքային կառավարման նախարարության Պետական միգրացիոն ծառայության համակարգչային կենտրոնը կփակեն եւ 2017 թվականին 9.2 մլն դրամ կտնտեսեն:
Կլուծարվի նաեւ Տրանսպորտի նախարարության երկաթուղու շինարարության տնօրինությունը: Արդյունքում տարեկան 37 մլն կտնտեսենք: Արդյո՞ք սա նշանակում է, որ մինչեւ հիմա այն անարդյունավետ է աշխատել եւ անիմաստ վատնել պետության փողերը: Նախարար Վահան Մարտիրոսյանը հավաստում է, որ կառույցը որոշ աշխատանքներ, ամեն դեպքում, արել է:
Մարտիրոսյանը նաեւ վստահեցրել է, որ այս օպտիմալացումը չի ազդի Իրան-Հայաստան երկաթուղու կառուցման նախագծի ուղղությամբ աշխատանքների վրա: Լրագրողները հետաքրքրվել են, թե այդ նախագիծն ի վերջո իրականություն կդառնա՞, թե՞ ոչ: Նախարարի պատասխանը ցանկությունների շարքից էր:
Իսկ արդեն իրականացվող մեկ այլ ծրագրի՝ «Հյուսիս-Հարավ» մայրուղու շինարարության առաջին արդյունքներից Վահան Մարտիրոսյանը գոհ է: Անձամբ է երթեւեկել նորաբաց ճանապարհահատվածով ու տպավորվել է:
Երեւանի Վարդանանց փողոցում 19-ամյա Վահե Մուրադյանի սպանության կասկածանքով նոր ձերբակալվածներ կան: Երեկ ուշ երեկոյան բերման էր ենթարկվել 20-ամյա Կարեն Չատիկյանը: Նա ձերբակալված է: Ավելի ուշ վիճաբանությանը մասնակցելու կասկածանքով բերման են ենթարկվել նաեւ Գեւորգ Տերտերյանը, Դավիթ Մանձիկյանը եւ Սերգեյ Գրիգորյանը: Իրավապահները որոնում են եւս երկու անձի՝ Քաջիկ Հակոբյանին եւ Անրի Ալեքսանյանին, ինչպես նաեւ հանցագործության գործիք դանակը:
Հիշեցնենք, որ Վահե Մուրադյանը մահացել է սրտի շրջանում սուր կտրող-ծակող առարկայի հարվածի հետեւանքով: Ձախ սրունքի կտրած-ծակած վնասվածքով էլ հիվանդանոց է տեղափոխվել 18-ամյա Ռաֆիկ Մարտիրոսյանը:
Գյումրիում Ավետիսյանների ընտանիքի ողբերգական սպանությունից երկու տարի անց սպանվածների հարազատները շարունակում են կարծել, որ իրական հանցագործները պատժված չեն: Համոզված են, որ սպանության մեջ մեղավոր ճանաչված Վալերի Պերմյակովը միայնակ չի գործել: Իրավիճակի մեղավորը սպանվածների հարազատներն իշխանությանն են համարում: Ասում են՝ դատավարությունը շինծու է եւ կարծում են, որ Հայաստանի իշխանություններն այս դատական գործընթացում չկարողացան պատշաճ կերպով պաշտպանել իրենց իրավունքները։
Հիշեցնենք, որ 2015 թվականի հունվարի 12-ին Գյումրիում տեղակայված ռուսական բազայի զինծառայող Վալերի Պերմյակովը մտել էր Ավետիսյանների տուն եւ գնդակահարել ընտանիքի 6 անդամներին, փոքրիկ Սերյոժային էլ՝ դանակահարել: Պերմյակովը ցմահ ազատազրկման է դատապարտվել:
Մահացու վրաերթ Երեւանում: Գայի պողոտայում «Լեքսուս» մակնիշի ավտոմեքենան վրաերթի է ենթարկել 74-ամյա Անիկ Ավետիսյանին: Վարորդը՝ Կոտայքի մարզի Ձորավան գյուղի 39-ամյա բնակիչ Մնացական Զիլիֆյանը, փախուստի չի դիմել: Նա կնոջը մարմնական վնասվածքներով հիվանդանոց է հասցրել, սակայն գիտակցության չգալով՝ տուժածը մահացել է:
Իսկ Բագրատունյաց փողոցում 68-ամյա տղամարդուն վրաերթի ենթարկողը փախուստի է դիմել: Տուժածին մարմնական վնասվածքներով հիվանդանոց են տեղափոխել: Ավելի ուշ իրավապահները պարզել են, որ վրաերթը կատարել է 25-ամյա Արտյոմը՝ «Օպել» մակնիշի ավտոմեքենայով: Նա բերման է ենթարկվել:
Երեւանում բանկոմատի պայթեցման եւ հափշտակության գործը բացահայտվել է, կասկածյալը ձերբակալված է: Պարզվում է՝ նա «Հրազդան» քրեակատարողական հիմնարկում է աշխատում: Բանկոմատը պայթեցրել էին անցյալ տարվա դեկտեմբերին ու 7.5 միլիոն դրամ հափշտակել: Կարճ ժամանակ անց էլ պայթուցիկ նյութեր էին հայտնաբերվել Բաղրամյան փողոցում գտնվող մեկ այլ բանկոմատի կողքին: Այստեղ իրավապահները գազի եւ թթվածնի համար նախատեսված բալոններ էին գտել:
Հունվարի 12-ին դոլարն ու եվրոն թանկացել են: Արդյունքում դոլարի փոխարժեքը կազմել է 485 դրամ, եվրոյինը՝ 516, ռուբլունը՝ 8 դրամ 18 լումա, ֆունտինը՝ 595 դրամ:
Հունվարի 13-ին հանրապետության առանձին շրջաններում թույլ ձյուն է սպասվում: Օդի ջերմաստիճանն էապես չի փոխվի: Երեւանում վաղը կեսօրից թույլ ձյուն է սպասվում, գիշերն ու առավոտյան՝ մառախուղ:
