Հայաստանի գազի եւ էլեկտրաէներգիայի սակագների նվազումը նախընտրական շոու չէ: Հունվարի 13-ին կայացած մամուլի ասուլիսում այս մասին հայտարարեց ՀՀ վարչապետ Կարեն Կարապետյանը:
Նրա խոսքով՝ ընտրություններ կան, թե՝ ոչ, ամեն օր լույս եւ գազ օգտագործում ենք: Այդ պատճառով ոչ մի վատ բան չկա նրանում, որ պետությունը մասնավոր հատվածի հետ համագործակցությամբ սակագները նվազեցնելու միջոց է գտել: «Դա նաեւ բիզնեսին կօգնի ավելի էժան ապրանքներ արտադրել, ինչը նշանակում է՝ ավելի մրցանակ լինել»,- հավելեց վարչապետը:
Հիշեցնենք, որ 2017 թվականի հունվարի 1-ից Հայաստանում գազի սակագինն էժանացել է: Մասնավորապես, տնային տնտեսությունների համար գազի մեկ խորանարդ մետրը 146.7 դրամից դարձել է 139 դրամ, անապահովների համար՝ 100 դրամ (տարեկան 600 խ.մ.-ի չափով): Փետրվարի 1-ից Հայաստանում բնակչության համար էլեկտրաէներգիայի սակագինը մեկ կՎտ/ժ-ի համար 46.2 դրամից դարձել է 44.98 դրամ: Գազի եւ էլեկտրաէներգիայի սակագները նվազել են նաեւ բիզնեսի համար: