Այս պահին ոչ ոք Հայաստանում բիզնեսի համար արհեստական խոչընդոտներ չի ստեղծում որեւէ շուկայում: Այս մասին հունվարի 13-ին՝ մամուլի ասուլիսի ժամանակ ասաց վարչապետ Կարեն Կարապետյանը:
Հարցին՝ արդյոք լսե՞լ է բանանի կամ շաքարավազի շուկայի մենաշնորհման մասին, վարչապետը պատասխանեց, որ իր ուժերից պարզապես վեր է անձամբ ճանաչել բանանի կամ ջեմի յուրաքանչյուր ներմուծողի: «Ես բանան ներկրողին իմանամ, շաքար ներկրողին իմանամ, ես սաղին իմանա՞մ։ Ինձ համար կարեւոր հարց չի, թե խոչընդոտողը պատժվել է, թե ոչ։ Ինձ համար կարեւոր է, որ այդ տենդենցը վերանա։ Օրինակ ունեք, բերեք ասեք, բայց ինձ միլիցա մի՛ սարքեք։ Ես իմ գործառույթը դրանում չեմ տեսնում։ Կա՞ բողոք, բողեքե՞լ է այդ մարդը ոստիկանություն, որ իրեն խոչընդոտել են ներմուծելիս։ Կարող եմ ասել, որ Հայաստանի շուկաներն ազատ են եւ հավասար հասանելի: Իսկ եթե ինչ-որ մեկը ինչ-որ խոչընդոտի է բախվել, կարող է իրավապահ մարմիններին դիմել: Որեւէ մեկն այդպիսի խնդիրներ ունեցե՞լ է, որեւէ մեկը դիմե՞լ է: Իսկ եթե ոչ, ապա ես չեմ կարող ամեն ինչ իմանալ եւ բոլորին բռնել»,- ասաց Կարապետյանը:
