«Բարգավաճ Հայաստան» կուսակցությունում անգամ ամենատարրական հարցը պատասխան չունի, քանի դեռ կուսակցության նախկին ղեկավար Գագիկ Ծառուկյանը չի հայտարարել իր վերադարձի մասին հստակ:
ԲՀԿ ղեկավար Նաիրա Զոհրաբյանը NEWS.am-ի հետ զրույցում հայտարարեց, որ կուսակցության ու ընտրական գործընթացներին վերաբերող հարցերին չի անդրադառնալու, քանի դեռ Ծառուկյանի հայտարարությունը չի հնչել:
Նշենք, որ Ծառուկյանը պետք է օրերս հայտարարեր քաղաքականություն վերադառնալու մասին վերջնականապես, սակայն սպասված ժամկետներից անգամ ուշանում է: Չնայած հայտարարության ձգձգվելուն` կուսակցության վերնախավը համոզված է, որ նա վերադառնալու է քաղաքականություն:
Կուսակցության համամասնական ցուցակում ազգային փոքրամասնությունների ներկայացուցիչներին ընդգրկելու հարցը եւս հստակեցված չէ, սակայն չի բացառվում, որ լինի կուսակցության ազգային փոքրամասնությունների հարցերի հանձնաժողովի պատասխանատու Բորիս Մուրազին:
«Մենք շահագրգիռ ենք, որ ազգային փոքրամասնության ներկայացուցիչը լինի մեր համամասնական ցուցակում: Մեր կուսակցությունը միակն է, որ իր ենթակառուցվածքում ունի ազգային փոքրամասնությունների հարցերով հանձնաժողով, որը ղեկավարում է Բորիս Մուրազի: Մենք ակտիվ զբաղվում ենք իրենց խնդիրներով, բայց չենք զբաղվում նրա համար, որ պարտական լինեն իրենց քվեն մեզ տալու: Որ մենք կներառենք համամասնական ցուցակում ազգային փորքամասնության ներկայացուցչի, դա կասկածից վեր է: Չի բացառում, որ Բորիս Մուրազին էլ կլինի: Բոլոր հարցերը, քննարկումները վերջնականապես կավարտվեն Ծառուկյանի հայտարարությունից հետո»,-ընդգծեց Նաիրա Զոհրաբյանը:
Նշենք, որ նոր Սահմանադրությամբ` քաղաքական ուժերը պարտավոր են համամասնական ցուցակներում ընդգրկել ազգային փոքրամասնությունների ներկայցուցիչների: Հայաստանի եզդիների միության նախագահ Ազիզ Թամոյանը մեզ հետ զրույցում հայտարարել էր, որ Հայաստանում ազգային փոքրամասնությունները միշտ էլ իշխանություններին են սատարել:
