Ազգային վիճակագրական ծառայության տեղեկությունների համաձայն՝ դեկտեմբերին տարեկան դեֆլյացիան կազմել է 1.1 տոկոս: Գնաճ է գրանցվել միայն ալկոհոլային խմիչքների եւ ծխախոտի խմբի ապրանքներում՝ միջինում 1.1 տոկոս:
Ինչպես հայտնի է, վերջին 2 տարում կտրուկ վատացել է արտաքին տրանսֆերտների պատկերը: Դրամական փոխանցումների կրճատումը լրջորեն նվազեցրել է հայկական շատ ընտանիքների եկամուտները:
2015-ին մանրածախ ապրանքաշրջանառության ծավալը ընթացիկ գներով տարեկան հաշվարկով կրճատվել էր 114 մլրդ դրամով:
Հատկապես մեծ անկում են գրանցել խանութները՝ 111 մլրդ դրամ: Այսինքն՝ մանրածախ առեւտրի այն հաստատությունները, որոնց ծառայություններից օգտվում են գրեթե բոլորը: Իսկ ահա ավտոմոբիլային վառելիք վաճառող օբյեկտների շրջանառությունը աննշան է կրճատվել՝ 2 մլրդ դրամով: Որոշ փոփոխություններով այդ երեւույթները կրկնվել են նաեւ անցյալ տարի:
Ձեռներեցները ստիպված էին հաշվի առնել այդ գործոնը, որը նրանց համար բավականին անցանկալի էր: Առանձին մանրածախ առեւտրի միջին ձեռնարկությունները բարդ ֆինանսական դրության մեջ են ընթացիկ եկամուտների անկման պատճառով:
Նախատոնական եռուզեռը միշտ գները բարձրացնելու լավ հնարավորություն է, հատկապես ամանորյա սեղանի համար պահանջված ապրանքների վրա: Բայց, պաշտոնական տվյալներով, պարենամթերքի միջին մանրածախ գները, նոյեմբերի համեմատ, դեկտեմբերին աճել են «միայն» 3.1 տոկոսով: Շատերն, իհարկե, կասկածի տակ են դնում այդ թվերը: Հարցն այստեղ մեթոդաբանական է. գների մշտադիտարկումն ավարտվում է ամեն ամսվա 20-ին: Այսինքն՝ վերջին տասնօրյակը, որին բաժին է հասնում սպառողական պահանջարկի գագաթնակետը, ուսումնասիրությունից դուրս է մնում:
Սակայն, առեւտրի մասնագետներից մեկի խոսքով, դեռեւս դեկտեմբերի սկզբից սկսվել էր մի շարք մթերքների շարունակական գնաճը՝ ցիտրուսային մրգեր, բանան, անանաս, չիր, ընկուզեղեն, մսամթերք, ձկան համադամ ուտեստներ եւ այլն:
Բանն այն է, որ սպառողական գների ինդեքսի հաշվարկի համար վիճակագիրներն օգտագործում են մանրածախ ապրանքաշրջանառության կառույցը, որում վերոնշյալ ապրանքների մասնաբաժինը համեմատաբար փոքր է: Այդ պատճառով դրանց ազդեցությունը գների ընդհանուր ինդեքսի վրա նվազագույն է: Միեւնույն ժամանակ այդ մթերքների գերածախսը ամանորին դրանց զգալի թանակցման պատճառով հասնում է զգալի չափերի։
Սմբատ Գրիգորյան