Մայիսի 31-ից կալանքի տակ գտնվող Ժիրայր Սեֆիլյանի հետ համագործակցությամբ ապօրինի զենք, զինամթերք պահելու մեջ մեղադրվող Ներսես Պողոսյանը 30 օր տեւած հացադուլից դուրս գալուց հետո կազդուրվում է: Այս մասին NEWS.am-ի թղթակցի հետ զրույցում ասաց Ներսես Պողոսյանի քույրը՝ Վարսիկ Վարժապետյանը:
Նա նշեց, որ հացադուլից դուրս գալուց հետո Ներսեսին տեսակցել է նրա շահերի պաշտպան Նինա Կարապետյանը, որն էլ հայտնել է, որ Ներսեսը հյուծված է:
«Եղբայրս ստամոքսի հետ կապված խնդիր ունի եւ նաբուլյոնների միջոցով պետք է կազդուրվի: Փաստաբանն ասաց, որ հյուծված տեսք ունի, բայց սնվելու ընթացքում կամաց-կամաց կկազդուրվի»,-ասաց նա:
Ներսես Պողոսյանը 30 օր տեւած հացադուլով պահանջում էր փոխել իր խափանման միջոց կալանքը, նա ամուսնացած է, երեք անչափահաս երեխա ունի:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարտվել է, գործն ուղարկվել է դատարան: