Քանի որ ապագայում ռոբոտները արտադրությունից մարդկանց դուրս կմղեն, ապա «խելացի մեքենաների» տերերը ստիպված կլինեն նրանց համար հարկ վճարել, համոզված է Շվեյցարիայի արհեստական ինտելեկտի լաբորատորիայի տնօրեն, պրոֆեսոր Յուրգեն Շմիդհուբերը: Այս մասին հայտնում է ՏԱՍՍ-ը:
«Մի օր ռոբոտները կարտադրեն այն, ինչը հիմա մարդիկ են անում: Նրանք կսկսեն սմարթֆոններ նախագծել եւ մոշ հավաքել»,- SonntagsBlick-ի հետ հարցազրույցում հայտարարել է նա: Նրա խոսքով՝ նման պայմաններում մարդկանց կմնա «նուրբ մասնագիտություններով» զբաղվել, որոնք տնտեսության համար առանցքային նշանակություն չունեն: Նա այդ մասնագիտություններին է դասել լրագրողի եւ գիտնականի մասնագիտությունները:
Այս պայմաններում օրակարգում է հայտնվում երկրի բոլոր քաղաքացիներին առանց պայմանի հիմնական եկամտից երաշխավորված նպաստ տրամադրելու հարցը, որպեսզի մարդիկ կենսապահովման միջոցներ ունենան: Շմիդհուբերի կարծիքով՝ ռոբոտացումը կփոխի աշխատանքային հարաբերությունները եւ կբերի հարկման նոր մոդելի: «Ռոբոտների տերերը պետք է հարկեր վճարեն՝ ֆինանսավորելու համար հասարակության անդամների պահանջմունքները, որոնք այլեւս չեն զբաղվի մասնագիտական գործունեությամբ»,- ամփոփել է պրոֆեսորը՝ նախազգուշացնելով, որ նրանք, ովքեր այս կարգին չեն համաձայնի, մեքենաների դեմ կըմբոստանան:
Աշխատանքի միջազգային կազմակերպությունում կարծում են, որ առանց պայմանի հիմնական եկամտից հարկման վերաբերյալ բանավեճերը աստիճանաբար «ավելի շատ կընդգրկվեն» տարբեր երկրների քաղաքական եւ հասարակական կյանքի մեջ: «Աշխարհում մեծանում է հետաքրքրությունը այն գաղափարի հանդեպ, որ պետությունը պետք է աշխատավարձից բացի, նվազագույն եկամուտ երաշխավորի»,- հայտարարել է կազմակերպության գլխավոր տնօրեն Գայ Ռայդերը: Ըստ նրա՝ աշխատանքի շուկայում նոր տեխնոլոգիաների հետ կապված փոփոխությունները աշխատավարձի այլընտրանքային տարբերակներ դիտարկելու հնարավորություն են տալիս: «Մենք պետք է գտնենք ազգային եկամուտը բաշխելու եղանակը, որը անմիջաբար կապված չէ մեր կատարած աշխատանքի եւ մեր ստացած աշխատավարձի հետ»,- նշել է Ռայդերը:
