Ղրղզստանում հունվարի 17-ին սգո օր կհայտարարվի։ Այս մասին հայտնում է երկրի նախագահ Ալմազբեկ Աթամբաեւի մամուլի ծառայությունը։ Պետության ղեկավարն արդեն ցավակցել է թուրքական Boeing-747 օդանավի վթարի զոհերի հարազատներին։
24.kg կայքի փոխանցմամբ՝ բեկորների մաքրման աշխատանքները շարունակվում են։ Վրաններ են խփել, որտեղ հոգեբանները զրուցում են զոհվածների հարազատների հետ։
«Մանաս» օդանավակայանից հայտնել են, որ օդանավը հարվածել է թռիչքուղուց 200 մ հեռավորության վրա գտնվող ծառերին եւ աերոնավիգացիայի շենքին։ «Նա արեւելքից արեւմուտք էր վայրէջք կատարում, եւ շասսին հարվածել է շենքին։ Ընկնելիս օդանավը հարվածել է 30 բնակելի տների»,– ասել են օդանավակայանից։
Boeing 747-400 բեռնատար օդանավը կործանվել է հունվարի 16-ի առավոտյան, օդանավակայանի մերձակայքի ամառանոցային ավանում: Վերջին տվյալներով՝ աղետի հետեւանքով 37 մարդ է զոհվել, 32 բնակելի տուն ավերվել է: