Ղարաբաղյան հակամարտության գոտում իրադրությունը կարող է սրվել, ինչպես 2016 թվականի ապրիլին: Հունվարի 16-ին կայացած մամուլի ասուլիսում այս մասին հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքով՝ ամեն ինչ կախված է տնտեսական իրադրությունից, նավթի գներից: «Չեմ կարծում, որ Ղարաբաղի հարցով բանակցային գործընթացում ինչ-որ բան կփոխվի: ԵԱՀԿ Մինսկի խումբն իրականում զբաղվում է ոչ թե հակամարտության կարգավորմամբ, այլ բռնության մակարդակը նվազեցնելու փորձերով»,- նշեց Իսկանդարյանը՝ հավելելով, սակայն, որ բռնությունը բացառելու լուրջ հնարավորություններ չկան:
«Դիվերսիաներ անպայման կլինեն, բայց լայնածավալ պատերազմ չեմ ակնկալում: Ամեն դեպքում, Ադրբեջանի կողմից հակառակորդին (Հայաստանին եւ Լեռնային Ղարաբաղին) ուժասպառ անելու ռազմավարությունը կարող է շարունակվել»,- հավելեց քաղաքագետը:
