Հանրապետությունում գրանցված ջերմային ֆոնն առաջիկա օրերին կպահպանվի: Այս մասին, այսօր՝ հունվարի 16-ին, ՀՀ արտակարգ իրավիճակների նախարարությունում հերթական ամենշաբաթյա խորհրդակցության ժամանակ նշել է «Հիդրոօդերեւութաբանության եւ մթնոլորտային երեւույթների վրա ակտիվ ներգործության ծառայություն» ՊՈԱԿ-ի տնօրեն Լ. Վարդանյանը:
Խորհրդակցությունը վարել է նախարարի ժամանակավոր պաշտոնակատար Հայկարամ Մխիթարյանը:
Փրկարար ծառայության տնօրեն, փ/ծ գնդապետ Մուշեղ Ղազարյանը զեկուցել է շաբաթվա ընթացքում գրանցված պատահարների, ձեռնարկած միջոցառումների եւ ընթացիկ աշխատանքների մասին: Նշված ժամանակահատվածում փրկարար ծառայությունն արձագանքել է 143 դեպքի: Մ. Ղազարյանը նշեց նաեւ, որ ծառայության բոլոր ստորաբաժանումները ներկայացնում են 2016թ.-ի կատարված աշխատանքների ամփոփումը:
«Հիդրոօդերեւութաբանության եւ մթնոլորտային երեւույթների վրա ակտիվ ներգործության ծառայություն» ՊՈԱԿ-ի տնօրեն Լ. Վարդանյանը ներկայացրել է առաջիկա օրերի եղանակի կանխատեսումը: Տնօրենը հայտնել է, որ առաջիկա 5 օրերին էական փոփոխություններ չեն սպասվում՝ արդեն գրանցված ջերմային ֆոնը կպահպանվի, կգրանցվի առանց տեղումների եղանակ:
Նախարարի գլխավոր խորհրդական Ս. Պետրոսյանը զեկուցել է Լոռու մարզում կապի եւ ազդարարման միջոցների տեղադրման մասին: Ս. Պետրոսյանը հայտնել է, որ Ստեփանավան քաղաքն ամբողջովին վերազինված է ազդարարման համակարգով, տարվում են աշխատանքներ անհրաժեշտություն ունեցող համայնքներում ծրագիրն իրագործելու ուղղությամբ:
Ամենշաբաթյա խորհրդակցությանն առցանց մասնակցող ԼՂՀ ԿԱ արտակարգ իրավիճակների պետական ծառայության տնօրենը եւ մարզային փրկարարական վարչությունների պետերը զեկուցել են շաբաթվա ընթացքում գրանցված պատահարների եւ ընթացիկ աշխատանքների մասին։ Զեկուցվել է նաեւ մարզերում ճանապարհների անցանելիության եւ երեք մարզերում ծավալված ժամանակավոր հենակետերի աշխատանքների մասին:
