Ադրբեջանի հաջողությունն այնպիսի հարցերում, ինչպես Երեւանում ԵԱՀԿ գրասենյակի գործունեության երկարաձգումն է, իմիջի հաջողություն է։ Իրական քաղաքականության մեջ դա չի կարող լուրջ փոփոխությունների բերել։ Այս մասին հունվարի 16-ին՝ մամուլի ասուլիսի ժամանակ, ասել է Կովկասի ինստիտուտի տնօրեն քաղաքագետ Ալեքսանդր Իսկանդարյանը։
«Չգիտեմ, թե ինչպես կլուծվի հարցը, բայց ինչպես ասվել էր, դրան դեմ է եղել մեկ երկիր, եւ մենք հասկանում ենք, թե որ երկիրը։ Դրա պատճառով հեղափոխություն տեղի չի ունենա։ Բայց Հարավային Կովկասում ԵԱՀԿ գրասենյակ կա միայն Երեւանում»,– ասաց քաղաքագետը։
Ավելի վաղ NEWS.am-ին ԵԱՀԿ Երեւանյան գրասենյակից հայտնել էին, որ ԵԱՀԿ մասնակից պետությունները դեռ կոնսենսուսի չեն հասել ԵԱՀԿ մի շարք դաշտային առաքելությունների մանդատների երկարաձգման հարցի շուրջ: «ԵԱՀԿ նախագահությունը շարունակում է բանակցություններ վարել այս հարցի շուրջ՝ վաղ համաձայնություն ձեռք բերելու նպատակով: Մինչեւ մասնակից երկրների կողմից մանդատների երկարաձգման հետ կապված սպասվող համաձայնության կայացումը, դաշտային առաքելությունները բաց կմնան եւ կշարունակեն ադմինիստրատիվ եւ մանդատի հետ կապ չունեցող աշխատանքները: Քանի որ բանակցություններն այս պահին ընթացքի մեջ են, մենք չենք կարող ենթադրություններ անել դրանց վերաբերյալ»,-ասված է հաղորդագրության մեջ: